بەڕێوەبەرایەتیی پۆلیسی هەولێر، بە هەماهەنگیی ئاسایش و پۆلیسی هاتوچۆ و پۆلیسی بەرگریی شارستانی و هێزە ئەمنییەكانی دیكە، پلانێكی ئەمنیی بۆ ڕۆژانی جەژنی ڕەمەزان داڕشتووە.
لیوای مافپەروەر عەبدولخالق تەڵعەت، بەڕێوەبەری پۆلیسی پارێزگای هەولێر، رایگەیاند، دوای كۆبوونەوە لەگەڵ بەرپرسانی هێزە ئەمنییەكانی هەولێر و دەوروبەری، بە هەماهەنگیی ئاسایش و پۆلیسی هاتوچۆ و بەرگریی شارستانی و سەرجەم هێزەكانی دیكە، پلانێكی ئەمنیی تۆكمەیان بۆ ڕۆژانی جەژنی رەمەزان داڕشتووە.
بەڕێوەبەری پۆلیسی پارێزگای هەولێر گوتیشی: پلانە ئەمنییەكە لە پێنجشەممەوە تا دوای جەژن بەردەوام دەبێت و جگە لەوەی تیمەكانی هێزەكانی ئاسایشی ناوخۆ لە دەرەوە و ناوەوەی شار بڵاوەیان پێ دەكرێت، لەناو كۆڵان و گەڕەكەكانیشدا مەفرەزەكانی هێزە هاوبەشە ئەمنییەكە، سەر و ماڵی هاونیشتمانیان دەپارێزن.
لیوا عەبدولخالق دەشڵێت، پێشبینی دەكرێت لە ڕۆژانی جەژندا، بە هەزاران گهشتیار بۆ بەسەربردنی كاتێكی خۆش، سهردانی پارێزگاكانی هەرێمی كوردستان بكهن.
کۆمێنت (0)
تا ئێستا هیچ کۆمێنتێک نەکراوە.