به داخه‌وه به‌ره‌به‌یانی رۆژی شه‌ممه ٢٦ی مه‌ی ٢٠١٨ محه‌ممه‌د ساڵه‌ح ئێبراهیمی (شه‌پۆل)، مامۆستای زانكۆ، نووسه‌ر و وه‌رگێری كوردی دانیشتووی شاری مه‌هاباد له ته‌مه‌نی ٨٥ ساڵیدا له‌و شاره به هۆی نه‌خۆشییه‌وه ماڵئاوایی له ژیان كرد.
مامۆستا شه‌پۆل، وه‌ك نووسه‌ر، وه‌رگێڕ، لێكۆڵه‌ر، ڕۆژنامه‌نووس، مامۆستای زانكۆ و ڕۆشنبیرێكی به ئه‌زموون و به‌توانا، ڕۆڵێكی گرینگی له پێشخستنی ئه‌ده‌بی كوردیدا گێڕاوه له‌ده‌ستدانیشی خه‌ساره‌تێكی گه‌وره‌یه.
محه‌ممه‌د ساڵه‌ح ئیبراهیمی (شه‌پۆل) رێكه‌وتی ٢٤/٦/١٩٣٣ له شاری مه‌هاباد له دایكبووه‌و سه‌ره‌تا روویكردۆته خوێندنی حوجره‌و مه‌لایی خوێندوه، به‌ڵام دواتر ده‌ستی كردوه به خوێندنی ئاكادێمی و مافی خوێندوه.
ساڵی ١٩٦١ چۆته زانكۆی تاران و به‌كالۆریۆسی ته‌واو كردوه، ساڵی ١٩٦٩ خوێندنی ماسته‌ری ته‌واو كردوه‌و ساڵی ١٩٩٢ ده‌ستی كردوه به خوێندنی دۆكتۆرا.
شه‌پۆل له سالی ١٩٦١ه‌وه ده‌ستی كردوه به هاوكاری له‌گه‌ڵ رادیۆ ده‌نگی كوردی تاران و كرماشان و چه‌ندین وتاری له سه‌ر ئه‌ده‌ب و ئه‌ده‌بی فۆلكلۆری كۆرد له‌و دوو رادیۆ بڵاو كردۆته‌وه.
شه‌پۆل له ماوه‌ی كاركردنیدا زیاتر له ٣٠ به‌رهه‌می پێشكه‌ش به كتێبخانه‌ی كوردی كردوه به نووسین و وه‌رگێڕانه‌وه كه به‌شێكیان ئه‌مانه‌ن:
١: شاعیرانی ناوداری كورد
٢: واڕگه و ناودارانی كورد (له پێنج به‌رگدا)
٣: زانایانی كورد (له سێ به‌رگدا)
٤: باوه‌ڕی كورده‌واری ( له سێ به‌رگدا)
٥: كۆزانی فه‌رهه‌نگی زمانی كوردی
٦: باوی كۆمه‌لایه‌تی و مێژویی
٧: راپه‌رینی حه‌زره‌تی شێخ عوبه‌یدیلای نه‌هری شاهی شه‌مزین
٨: راپه‌رینی ژنرال مسته‌فا بارزانی 4 به‌رگ
٩: . مه‌ولانا خالد شاره‌زوری
١٠: ژیناوه‌ری زانایانی كورد ....یا گه‌نجینه‌ی فه‌رهه‌نگ و زانست
١١: یوسف و زوله‌یخا
١٢: وه‌رگێرانی كتێبی زیندوی كوڕی بیدار
١٣: وه‌رگێرانی كتێبی شاره‌هه‌نگ
دوایین به‌رهه‌می ئه‌م نووسه‌ر و لێكۆڵه‌ری كورد، كۆمه‌ڵه وتارێك بوو به ناوی (كۆبانی) له سه‌ر كۆبانی و رووداوه‌كان كه هاوێنی ٢٠١٧ چاپ و بڵاو كرایه‌وه.
سه‌رچاوه/ ئاسۆی رۆژهه‌ڵات
كوردستان تیڤی/ كامه‌ران حاجی
کۆمێنت (0)
تا ئێستا هیچ کۆمێنتێک نەکراوە.