له چوارچێوه‌ی پته‌و كردنی په‌یوه‌ندیه‌كانی نێوان هه‌رێمی كوردستان له گه‌ل هه‌رێمی فلانده‌زی وڵاتی به‌لجیكا و له‌سه‌ر راسپارده‌ی سه‌رۆك وه‌زیران فلانده‌رز شاندێكی ژووری بازرگانی به‌لجیكی VOKA سه‌ردانی هه‌رێمی كورستانیان كرد و له گه‌ل وه‌زاره‌تی بازرگانی و ژووری بازرگانی كوردستان و ده‌سته‌ی وه‌به‌رهێنان و سه‌رۆكی زانكۆی سه‌ڵاحه‌دین و فه‌رمانگه‌ی په‌یوه‌ندیه‌كانی ده‌ره‌وه‌ی حكومه‌تی هه‌رێم كۆبوونه‌وه.
شایه‌نی باسه ژووری بازرگانی به‌لجیكا VOKA مه‌زنترین دامه‌زراوه‌ی بازرگانی و ئابووریه له به‌لجیكا و له زیاتر له 18 هه‌زار كۆمپانیا پێك دێت.
له‌م باره‌شه‌وه "دلاوه‌ر ئاژگه‌یی" نوێنه‌ری حكومه‌تی هه‌رێمی كوردستان له یه‌كێتی ئه‌وروپا ڕایگه‌یاند: به مه‌به‌ستی به‌نێوده‌وله‌تی كردنی كۆمپانیاكانی كوردستان له ئێستادا حكومه‌تی هه‌رێمی فلانده‌رز بودجه‌یه‌كی تایبه‌تی بۆ پێدانی مه‌شق و راهێنان به كۆمپانیا بچووك و مامناوه‌نده‌كانی هه‌رێمی كوردستان ته‌رخانكردووه و له ئایه‌نده‌یه‌كی نزیكدا ده‌چێته بواری جێبه‌جێ كردن.
راشیگه‌یاند: بڕیاره له ئاینده‌شدا شاندێكی كۆمپانیا به‌لجیكایه‌كان سه‌ردانی هه‌رێمی كوردستان بكه‌ن.
هه‌روه‌ها نوێنه‌ری حكومه‌تی هه‌رێمی كوردستان له یه‌كێتی ئه‌وروپا رایگه‌یاند: پێشتر به‌لجیكا به ناردنی یارمه‌تی سه‌ربازی و پشتیوانی ئاسمانی و پێدانی مه‌شق و راهێنان به هێزی پێشمه‌رگه و چاره‌سه‌ركردنی پێشمه‌رگه برینداره‌كان له به‌لجیكا هاوكاری هه‌رێمی كوردستانی كردووه و پرۆتۆكۆلی هاوكاری له‌گه‌ڵ هه‌رێمی كوردستان واژۆ كردووه.
کۆمێنت (0)
تا ئێستا هیچ کۆمێنتێک نەکراوە.