ئێواره‌ی دوێنێ سێشه‌ممه 10/4/2018 نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له دۆگلاس سیلیمان باڵیۆزی ئه‌مه‌ریكا له عێراق كرد كه كین گرۆس كونسوڵی گشتیی ئه‌مه‌ریكا له هه‌ولێر و شاندێكی دیپلۆماسی، یاوه‌رییان ده‌كرد.
له دیدارێكدا كه قوباد تاڵه‌بانی جێگری سه‌رۆك وه‌زیرانی هه‌رێمی كوردستان ئاماده‌ی بوو، سیلیمان پرسه و سه‌ره‌خۆشیی خۆی پێشكه‌ش به سه‌رۆك وه‌زیرانی هه‌رێمی كوردستان كرد بۆ كۆچی دواییی خوالێخۆشبوو دلۆڤان ئیدریس بارزانی ـی برایان، دواتر باسی له پێشهاته‌كانی ناوچه‌كه به‌گشتی و به‌تایبه‌تی پرۆسه‌ی هه‌لبژاردن و به‌ره‌وپێشوه‌چوونی په‌یوه‌ندییه‌كانی هه‌ولێر و به‌غدا كرد و له‌مباره‌یه‌وه ده‌ستخۆشی له هه‌ردوولا كرد بۆ ئه‌و دیالۆگه‌ی بۆ چاره‌سه‌ركردنی كێشه‌كان ئه‌نجام ده‌درێن.
لای خۆیه‌وه سه‌رۆك وه‌زیرانی هه‌رێمی كوردستان سوپاسی سه‌ردان و پێشكه‌شكردنی پرسه و سه‌ره‌خۆشی له به‌ڕێز سیلیمان و شاندی یاوه‌ری كرد، هه‌روه‌ها سوپاسی كردن بۆ پشتگیكردن له دروستبوونی ئه‌و دیالۆگه‌ی ئێستا له‌نێوان هه‌ولێر و به‌غدا هه‌یه.
له ته‌وه‌رێكی دیكه‌ی كۆبونه‌وه‌كه‌دا باس له مه‌ترسیی سه‌رهه‌ڵدانه‌وه‌ی داعش و توندوتیژی كرا و له‌مباره‌یه‌وه هه‌ردوولا له‌سه‌ر پێویستیی هه‌ماهه‌نگییه‌كی باشتر له‌نێوان هه‌موو لایه‌نه‌كاندا بۆ ڕێگریكردن له توندوتیژی، هاوڕا بوون.
تاوتێكردنی چه‌ند پرسێكی په‌یوه‌ست به ناوچه‌كه و ئاڵوگۆڕكردنی بیروبۆچوون له‌باره‌یانه‌وه، لایه‌نێكی دیكه‌ی دیداره‌كه بوو.
کۆمێنت (0)
تا ئێستا هیچ کۆمێنتێک نەکراوە.