له هه‌فته‌ی رابردوو تا ئێستا نزیكه‌ی ٥٠ نه‌خۆشی سنووری پارێزگای سلێمانی سه‌ردانی نه‌خۆشخانه‌ی فریاكه‌وتنی رۆژهه‌ڵاتیان له‌شاری هه‌ولێر كردووه و چاره‌سه‌ری پێویستیان وه‌رگرتووه.
سه‌ید زه‌مان حه‌سه‌ن، یاریده‌ری به‌ڕێوه‌به‌ری نه‌خۆشخانه‌ی فریاكه‌وتنی رۆژهه‌ڵات، رایگه‌یاند: له سه‌ره‌تای دروستبوونی ئه‌و قه‌یرانه‌ی كه هه‌رێمی كوردستانی گرتووه‌ته‌وه به‌رده‌وامین و به ته‌واوی ستافی نه‌خۆشخانه‌كه‌مان ٢٤ كاتژمێر كارده‌كه‌ین، به تایبه‌ت له‌م چه‌ند رۆژه‌ی رابردوو كه بایكۆت له به‌شێك له ناوچه‌كانی هه‌رێمی كوردستان ده‌ستی پێكرد و ئێمه‌یش وه‌كو نه‌خۆشخانه‌ی فریاكه‌وتنی رۆژهه‌ڵات به به‌رده‌وامی له خزمه‌تی ئه‌و هاونیشتمانییانه‌دابووین كه پێویستییان به وه‌رگرتنی چاره‌سه‌ر هه‌بوو له نه‌خۆشخانه‌كه‌مان.
هه‌روه‌ها گوتیشی: ئه‌و بایكۆتكردنه‌ی له پارێزگای سلێمانی هه‌یه كاریگه‌ری ته‌واوی كردووه‌ته سه‌ر نه‌خۆشخانه‌كانی هه‌رێمی كوردستان، به جۆرێك له میانی هه‌فته‌ی رابردوودا، ٤٩ حاڵه‌تمان له سلێمانی و هه‌ڵه‌بجه و راپه‌ڕین بۆ هاتووه و لێره چاره‌سه‌ری پێویستییان وه‌رگرتووه كه هه‌ندێكیان له نه‌خۆشخانه ده‌رچوون و هه‌ندێكیان خه‌وێنراون و ماونه‌ته‌وه.
ئاماژه‌ی بۆ ئه‌وه‌شكرد كه به شێوه‌یه‌كی ئاسایی رۆژانه ٦٠٠ تا ٧٠٠ هاووڵاتیی سه‌ردانی نه‌خۆشخانه‌ی فریاكه‌وتنی رۆژهه‌ڵات ده‌كه‌ن و بایكۆتكردنه‌ش وایكردووه كه لۆدێكی زۆر له‌سه‌ر نه‌خۆشخانه‌كه دروست بێت، جگه له پێداویستی پزیشكیش كه رۆژانه به‌كاردێت بۆ نه‌خۆشه‌كان.
هاوكات دكتۆر سامان به‌رزنجی، به‌ڕێوه‌به‌ری گشتی فه‌رمانگه‌ی ته‌ندروستی هه‌ولێررایگه‌یاند: به هۆی بایكۆتكردنه‌وه له سنووری پارێزگاكانی سلێمانی و هه‌ڵه‌بجه‌وه، به سه‌دان نه‌خۆش روویان له نه‌خۆشخانه‌كانی هه‌ولێر كردووه و چاره‌سه‌ری پێویستیان وه‌رگرتووه و ئه‌مه‌ش وایكردووه كه ستافی نه‌خۆشخانه‌كان به‌رده‌وام له حاڵه‌تی ئاماده‌باشی زیاتردابن.
ئاماده‌كردنی: رزگار
کۆمێنت (0)
تا ئێستا هیچ کۆمێنتێک نەکراوە.