ئه‌مرۆ مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازیی له خاتوو تۆن ئاله‌رس باڵیۆزی نوێی نه‌رویج بۆ ئوردن و عێراق كرد.
له‌م دیداره‌كه‌دا باڵیۆزی نه‌رویجی سوپاس و پێ زانینی وڵاته‌كه‌ی بۆ هه‌رێمی كوردستان و قوربانیدانی هێزی پێشمه‌رگه له جه‌نگی دژ به تیرۆر ڕاگه‌یاند و ئاماژه‌ی به ئه‌وه‌دا كه نه‌رویج به گرنگیه‌وه ده‌ڕوانێته ڕۆلی هه‌رێم له ناوچه‌كه‌دا و خوازیاری فراوانتركردنی زیاتری په‌یوه‌ندیی دوولایه‌نه له گه‌ل هه‌رێمی كوردستانن. باڵیۆزی نه‌رویج پشتگیریی وڵاته‌كه‌ی بۆ دانوستانی نیوان هه‌ولێر و به‌غدا دووپات كردوه و ئاواتی خواست هه‌رچی زووتر ئه‌م دانوستانانه ئه‌نجامی ئه‌رێنیی لێ بكه‌وێته‌وه.
راوێژكاری ئه‌نجوومه‌نی ئاسایشی هه‌رێمی كوردستان ئاواتی سه‌ركه‌وتنی بۆ خاتوو ئاله‌رس له پۆسته نوێیه‌كه‌یدا خواست و ستایشی وڵاتی نه‌رویجی كرد بۆ ئه‌و پاڵپشتی و هاوكاریانه‌ی كه له چوارچێوه‌ی هاپه‌یمانیی نێوده‌وڵه‌تی دژ به داعشدا پێشكه‌شی هه‌رێمی كوردستانیان كردووه.
مه‌سرور بارزانی له باره‌ی دوا ره‌وشی عێراق و ناوچه‌كه ڕایگه‌یاند كه ده‌بێت كۆمه‌ڵگای نێوده‌وڵه‌تی كاراتر ئه‌ركه‌كانی له ناوچه‌كه‌دا جێبه‌جێ بكات تاكو زه‌مینه بۆ سه‌رهه‌ڵدانی توندوتیژی و گه‌شه‌كردنه‌وه‌ی تیرۆر نه‌ره‌خسێته‌وه. له باره‌ی په‌یوه‌ندییه‌كانی هه‌ولێر و به‌غدا راوێژكاری ئه‌نجوومه‌نی ئاسایشی هه‌رێم جه‌ختی له سه‌ر دانوستانه‌كان له سه‌ر بنه‌مای جێبه‌جێ كردنی ده‌ستوور كرده‌وه و ڕوونی كرده‌وه كه هه‌رێمی كوردستان ئه‌ركه ده‌ستووریه‌كانی جێبه‌جێ كردووه به‌ڵام له به‌غدا خۆدزینه‌وه له جێبه‌جێ كردنی كۆی ده‌ستوور وه‌ك یه‌ك په‌كێج هه‌یه.
کۆمێنت (0)
تا ئێستا هیچ کۆمێنتێک نەکراوە.