ئێوارەی ئەمڕۆ دووشەممە كۆسره‌ت ره‌سول عه‌لى جێگری سكرتێری گشتیى یه‌كێتى لەبارەی ئۆپەراسیۆنەكانی سەر عەفرین لەلایەن سوپای توركیاوە، پەیامێكی بڵاوكردەوە.
لە پەیامەكەی كۆسرەت رەسولدا هاتووە "زۆر به‌داخه‌وه له چه‌ند رۆژی رابردووه‌وه سوپاى توركیا و چه‌ند هێزێكی تر ئۆپەراسیۆنێكی سەربازی گەورەیان بۆ سه‌ر عه‌فرینى رۆژئاواى كوردستان ده‌ستپێكردووه، ئه‌م هه‌نگاوه مایه‌ى نیگه‌رانى هه‌موومانه و داواكارین هه‌رچی زووه توركیا ئه‌و هێرشانه بوه‌ستێنێ و چیتر خه‌ڵكى سڤیل نه‌كرێنه قوربانى ململانێ سیاسی و سه‌ربازییه‌كان".
جێگری سكرتێری گشتیی یەكێتی هەروەها نووسیویەتی "روون و ئاشكرایه كه گه‌لى كورد به‌درێژایی مێژووى تا به‌مڕۆ ده‌گات، هه‌میشه ویستوویه‌تى به‌شێوه‌یه‌كى ئاشتیانه و له كه‌شێكى دیموكراسیدا ژیان بكات، به‌ڵام به‌داخه‌وه هه‌میشه بە چەك وەڵام دراوینەتەوە و هێرش كراوەتە سەرمان، ئه‌م ئۆپەراسیۆنەش به درێژكراوه‌ى ئه‌و سیاسه‌ته ده‌زانین و داواكارین لە وڵاتانى زلهێزى دنیا و كۆمه‌ڵگاى نێوده‌وڵه‌تى به‌زووترین كات له‌دژی ئه‌و هێرشانه بێنه ده‌نگ و بیوه‌ستێنن، هه‌روه‌ك گیان و ژیانى سه‌رجه‌م هاووڵاتیانى عه‌فرین له ئه‌ستۆی هێرشكارانه و پێویسته ژیانێكى ئازاد و سه‌لامه‌ت بژین".
كۆسرەت رەسول دەڵێ "ئەزموونی بەرەنگاربوونەوە و لەناوبردنی تاریكپەرستان و تیرۆریستان دەریخست كە ئیرادەی گەلەكەمان لە ڕۆژئاوا چەندە بەهێزە و هەر ئەو ئیرادە بەهێزەشە بۆتە هەوێنی ئاشتی و ئارامی و پێكەوەژیانی پێكهاتە جیاوازەكان لە ڕۆژئاوادا، مێژووش پێمان دەڵێ كە ئیرادەی گەلی كورد بەهێز ناشكێ، بۆیە باشترین ڕێگا بۆ چارەسەری كێشەكان ڕێگای دیالۆگ و ئاشتی و كۆبوونەوەیە لەسەر مێزی دانوستان".
لەوەتەی رۆژی شەممەوە سوپای توركیا ئۆپەراسیۆنێكی بەهاوكاری میلیشیا عەرەبیەكانی سوپای ئازادیی سووریا بۆ سەر شاری عەفرینی رۆژئاوای كوردستان دەستپێكردووە، تا ئێستە بەهۆی هێرشی ئاسمانی و تۆپبارانەوە، دەیان خەڵكی سیڤیل كوژراون و بریندار بوون.
کۆمێنت (0)
تا ئێستا هیچ کۆمێنتێک نەکراوە.