وتاربێژی هه‌ینی شاری زاهیدان سه‌ر به پارێزگای سێستان و به‌لۆچستان كه یه‌كێكه له زانایانی ئایینی سوننه مه‌زهه‌ب له ئێران، رایده‌گه‌ێنێ، به‌داخه‌وه له هه‌ندێك شاردا فشاره‌كان بۆ سه‌ر سوننه درێژه‌ی هه‌یه و مزگه‌وته‌كان داده‌خرێن.
مه‌وله‌وی عه‌بدولحه‌مید ئیسماعیل زه‌هی ، وتاربێژی هه‌ینی شاری زاهیدان سه‌ر به پارێزگای پارێزگای سێستان و به‌لۆچستان، كه یه‌كێكه له زانایانی ئایینی سوننه مه‌زهه‌ب له ئێران رایگه‌یاند: به‌رپرسانی حكوومه‌ت و ده‌وڵه‌ت، ده‌بێت ناڕه‌زایه‌تی و خۆپیشاندانه‌كانی خه‌ڵك به‌هه‌ند وه‌ربگرن و گوێ له گله‌ییه‌كان بگرن. له‌چوارچێوه‌ی ئازادییه‌كانی ده‌ستوور و ئاییندا، ده‌بێت دان بنرێت به مافی ئازادی راده‌ربڕینی خه‌ڵك و ئه‌و فشارانه‌ی له‌سه‌ر خه‌ڵكن سووك بكرێن.
هه‌روه‌ها ده‌شڵێت: له لایه‌كه‌وه خه‌ڵك ناره‌حه‌تی ده‌چێژێت و له لایه‌كی تره‌وه رووبه‌ڕووی كێشه‌ی ئابووری و گرانی ژیان بۆته‌وه. به‌رپرسان ده‌بێت ئه‌م كێشانه ببینن و له هه‌ر هه‌لومه‌رجێكدا له پاڵ خه‌ڵكدا بن، بۆ ئه‌وه‌ی چاره‌سه‌ریی كێشه‌كانی خه‌ڵك بكرێت، ده‌بێت له‌گه‌ڵ ده‌رده‌كانیان هاوده‌رد بن.
گوتیشی: كۆمه‌ڵگه‌ی سوننه ده‌یه‌وێت ئه‌و جیاكارییه‌ی 40 ساڵه به‌رامبه‌ری په‌یڕه‌وده‌كرێت كۆتایی پێبێت. بۆ نموونه له شارێكی گه‌وره‌دا مزگه‌وتێكی بچووكی لێیه، سه‌ره‌ڕای به‌دواداچوون و پێداگری و نووسراوه‌كانمان، به‌ڵام هیچیان له‌به‌رچاونه‌گیران كه ئه‌وه مایه‌ی نیگه‌رانییه. به‌داخه‌وه له هه‌ندێك شاردا فشاره‌كان بۆ سه‌ر سوننه درێژه‌ی هه‌یه و مزگه‌وته‌كان داده‌خرێن.
کۆمێنت (0)
تا ئێستا هیچ کۆمێنتێک نەکراوە.