جەستن ترۆدۆ سەرۆک وەزیرانی کەنەدا هاوسۆزیی و هاوخەمیی هاووڵاتییانی کەنەدای بۆ قوربانییانی بوومەلەرزەکەی شەوی رابردووی هه‌رێمى كوردستان و رۆژهەڵاتی کوردستان و عێراق و ئێران، دەربڕی.
سەرۆک وەزیرانی کەنەدا لە هەژماری تایبەتیی خۆی لە تۆڕی کۆمەڵایەتیی (تویتەر)، رایگەیاندووە، هەواڵێکی ناخۆش و تراژیدی لە عێراق و ئێرانەوە بیستمان.
شەوی یەکشەممە 12-11-2017 بوومەلەرزەیەکی بەهێز هەر چوار پارچەی کوردستان و عێراق و ئێرانی هەژاند، بەهۆیەوە لە هه‌رێمى کوردستان 8 هاونیشتمانی گیانیان لەدەستدا و 535 هاونیشتمانی دیکەش بریندار بوون. زۆرترینی کوژراو و بریندارەکان لە دەربەندیخان و کەلار بوون.
لە راگەیێندراوێکیشدا وەزارەتی تەندروستیی ئێران رایگەیاند: "بەهۆی بوومەلەرزەکەی شەوی رابردوو 407 کەس لە رۆژهه‌لاتى كوردستان گیانیان لەدەستداوەو 6 هەزار کەسیش برینداربوون، كه زۆربەی قوربانییەکان خەڵکی پارێزگای کرماشانن.
تێزانین شەوی رابردوو 12-11-2017 بوومەلەرزەیەكی بەهێز هەر چوار پارچەی كوردستان و چەند وڵاتێكی دیكەی هەژاند و بەپێی سەنتەرەکانی جیۆلۆجی ئەمریکا و ئێران و بەڕێوەبەرایەتیی کەشناسی و بوومەلەرزەزانی هەرێمی کوردستان، نێوەندی بوومەلەرزەكە له‌نێوان باشوور و رۆژهەڵاتی كوردستان (هەڵەبجە و كرماشان) بووە، گوڕەكەشی لەنێوان 7 بۆ 7.6 پلەی رێختەر بووە.
کۆمێنت (0)
تا ئێستا هیچ کۆمێنتێک نەکراوە.