پاشنیوه‌ڕۆی ئه‌مڕۆ پێنجشه‌ممه 26/10/2017 به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له به‌ڕێز بۆنتۆس میلانده‌ر باڵیۆزی نوێی وڵاتی سوید له عیراق و شاندێكی یاوه‌ری كرد.
له دیدارێكدا به‌ڕێز میلانده‌ر سوپاسی ئه‌و پێشوازییه‌ی كرد و خۆشحاڵیی خۆی به یه‌كه‌م سه‌ردانی بۆ هه‌رێمی كوردستان ده‌ربڕی دوای ده‌ستبه‌كاربوونی وه‌ك باڵیۆزی سوید له به‌غدا.
نیگه‌رانیی خۆیشی به‌رامبه‌ر ئه‌و ڕووداوانه نیشان دا كه دوو هه‌فته‌یه له ناوچه‌كه ڕوویان داوه و به‌هۆیه‌وه شه‌ڕ و پێكدادان دروست بوون و ژماره‌یه‌كی زۆری خه‌ڵكی سڤیل ئاواره بوونه، جه‌ختی له‌وه‌ش كرده‌وه كه پێویسته هه‌موو لایه‌ك دان به‌خۆیاندا بگرن و هه‌وڵ بدرێت به ڕێگه‌ی دیالۆگ كێشه‌كان چاره‌سه‌ر بكرێن.
لای خۆیه‌وه به‌ڕێز سه‌رۆك وه‌زیرانی هه‌رێمی كوردستان سوپاسی ئه‌و سه‌ردانه‌ی كرد و هیوای سه‌ركه‌وتنی بۆ به‌ڕێز باڵیۆزی نوێی سوید له عیراق خواست له كار و ئه‌ركه‌كانیدا، ئاماژه‌ی به‌وه‌ش دا له ئه‌نجامی ڕووداوه‌كانی ئه‌م دواییه‌دا ژماره‌یه‌كی زۆری خه‌ڵكی سڤیل ئاواره بوونه و كوشتاری لێكه‌وتۆته‌وه و گرژییه‌كی زۆری له سنووری نێوان هه‌رێمی كوردستان و حكوومه‌تی فیدراڵی عیراق دروست كردووه.
به‌ڕێزیان دووپاتیشی كرده‌وه كه حكوومه‌تی هه‌رێمی كوردستان هه‌ر له سه‌ره‌تاوه باوه‌ڕی به دیالۆگ هه‌بووه و ئێستاش جه‌خت له‌وه ده‌كاته‌وه كه ئه‌و گرژی و توندوتیژیانه پرسه‌كان چاره‌سه‌ر ناكه‌ن، به‌ڵكو پێویسته هه‌ولێر و به‌غدا ده‌ست به گفتوگۆ بۆ چارسه‌ركردنی كێشه‌كان بكه‌ن، داواشی كرد كۆمه‌ڵگه‌ی نێوده‌وڵه‌تی فشار بخاته سه‌ر به‌غدا بۆ وه‌ستاندنی ئه‌و گرژی و جموجۆڵه سه‌ربازییانه‌ی له ناوچه‌كه ئه‌نجامی ده‌دات و زه‌مینه‌سازی بۆ دروستكردنی گفتوگۆیه‌كی جددی له نێوان هه‌ولێر و به‌غدا بكه‌ن.
هه‌روه‌ها دووپاتی كرده‌وه كه سه‌ركردایه‌تیی سیاسی و حكوومه‌تی هه‌رێمی كوردستان به ڕێگه‌ی چه‌ندین په‌یامی فه‌رمییه‌وه پاڵپشتیی خۆیان بۆ دیالۆگ و گفتوگۆ ده‌ربڕیوه و دوا جاریش حكوومه‌تی هه‌رێمی كوردستان به مه‌به‌ستی ڕاگرتنی ده‌ستبه‌جێی شه‌ڕ و سڕكردنی ئه‌نجامه‌كانی ڕیفراندۆم و ده‌ستپێكردنی گفتوگۆیه‌كی جددی، په‌یامێكی بۆ ڕای گشتی عیراق و كوردستان و جیهان ڕاگه‌یاند.
کۆمێنت (0)
تا ئێستا هیچ کۆمێنتێک نەکراوە.