محه‌مه‌د نه‌زه‌ری كه له ساڵی 1993ـه‌وه به تۆمه‌تی ئه‌ندامێتیی له حزبی دیموكراتی كوردستانی ئێران زیندانیی كراوه، مانی له خواردن گرتووه تا داواكه‌ی بگاته جه‌ماوه‌ر .
ئه‌و له 24 ساڵی رابردوودا ته‌نانه‌ت یه‌ك رۆژیش مۆڵه‌تی بۆ چوونه ده‌ره‌وه له زیندان پێنه‌دراوه و له‌و ماوه‌یه‌شدا ته‌واوی كه‌سوكاری كۆچی دواییان كردووه .
محه‌مه‌د نه‌زه‌ری كه بڕیاری زیندانی تاهه‌تایی به‌سه‌ردا سه‌پێنراوه له زیندانی گه‌وهه‌رده‌شتی شاری كه‌رج به‌ند كراوه و ماوه‌ی دوو مانگه مانگرتنی راگه‌یاندووه و داوا ده‌كات پێداچوونه‌وه به‌و سزایه‌دا بكرێت كه بۆی دیاریكراوه .
ماڵپه‌ڕی كه‌مپینی مافی مرۆڤی ئێران له‌زاری سه‌رچاوه‌یه‌كی ئاگاداره‌وه نووسیویه‌تی كه ئه‌گه‌ر یاسای نوێی سزای ئیسلامیی سه‌باره‌ت به‌م زیندانییه بگیرێته‌به‌ر، ئه‌وا ده‌بێ ئازاد بكرێت. به‌ڵام ناوبراو نه پارێزه‌ری هه‌یه و نه كه‌سوكارێك كه بتوانن بكه‌ونه دوای دۆسییه‌كه‌ی، هه‌ر له‌به‌ر ئه‌وه‌ش بڕیاریداوه كه مانگرتن له خواردن رابگه‌یه‌نێت تا به‌ڵكو ده‌نگی ناڕه‌زایه‌تییه‌كه‌ی ببیسرێت .
جێی باسه كه محه‌مه‌د نه‌زه‌ری خه‌ڵكی شاری شاهیندێژی سه‌ر به پارێزگای ئازه‌ربایجانی رۆژئاوایه و به تۆمه‌تی ئه‌ندامێتیی حزبی دیموكراتی كوردستانی ئێران له شاری بۆكان ده‌ستگیركرا و له شاری مهاباد دادگایی كرا. سه‌ره‌تای ده‌ستگیركرانیشی سزای سێداره‌ی بۆ بڕایه‌وه، به‌ڵام دواتر سزاكه‌ی گۆڕا بۆ زیندانی تاهه‌تایی .
سه‌رچاوه / ماڵپه‌ڕی دی ده‌بلیوو
مه‌سعود مه‌عروف
کۆمێنت (0)
تا ئێستا هیچ کۆمێنتێک نەکراوە.