عه‌شائیره عه‌ره‌به‌كانی نه‌ینه‌وا داوا له حه‌یده‌ر عه‌بادی ده‌كه‌ن، ریفراندۆمێكی تایبه‌ت به جیابوونه‌وه‌ی عێراق له ئێران رێك بخات و عێراق له ده‌ستی سوپای پاسداران و فه‌یله‌قی قودس ئازاد بكات.
به پێی هه‌واڵێكی به‌غداد ئه‌لیوم ، شێخ مزاحم ئه‌حمه‌د ئه‌لحوه‌یت، وته‌بێژ به ناوی عه‌شائیره عه‌ره‌به‌كانی نه‌ینه‌وا رایگه‌یاندووه: ئێمه وه‌ك عه‌شائیره عه‌ره‌به‌كانی نه‌ینه‌وا، پێمان وایه لێدوانه‌كانی قه‌یس خه‌زعه‌لی ، سكرتێری گشتی بزووتنه‌وه‌ی عه‌سائیبی ئه‌هلی حه‌ق، دژ به هه‌رێمی كوردستان، منداڵانه‌یه‌و ناوبراو له‌لایه‌ن ئێرانه‌وه پاڵپشتی ده‌كرێ.
هه‌روه‌ها گوتی: لێدوانه‌كانی خه‌زعه‌لی ده‌ربڕی شكستی ئێران و سیخوڕه‌كانی هاوشێوه‌ی خه‌زعه‌لییه ، به‌وه‌ی كه له‌سه‌دا %92ی خه‌ڵكی كوردستان ده‌نگیان به سه‌ربه‌خۆیی داوه .
گوتیشی: ئه‌و لێدوانانه له كاتێكدایه كه ده‌وڵه‌تی كوردستان، شكستی به پیلانه‌كانی خه‌زعه‌لی و ئاغاكانی ، له رۆژهه‌ڵاتی ناوه‌راستدا هێناوه.
ئه‌لحوه‌یت داواشی له حه‌یده‌ر عه‌بادی كرد، ریفراندۆمێكی تایبه‌ت به جیابوونه‌وه‌ی عێراق له ئێران رێك بخات و عێراق له ده‌ستی سوپای پاسداران و فه‌یله‌قی قودس ئازاد بكات.
جه‌ختیشیكرده‌وه،پێویسته له‌سه‌ر به‌غدا سنوورێك بۆ پێشێلكارییه‌كانی هه‌رزه‌كارانی ئێران دابنێ، هۆشداری ئه‌وه‌شی دا ،هه‌ركه‌سێك هه‌وڵ بدات له هه‌ر ناوچه‌یه‌كی هه‌رێمی كوردستان نزیك بێته‌وه،ده‌ستی ده‌بڕن و وه‌ك داعش مامه‌ڵه‌ی له‌گه‌ڵدا ده‌كه‌ن.
رۆژی یه‌ك شه‌ممه 8-10- 2018 قه‌یس خه‌زعه‌لی له نامه‌یه‌كیدا داوای له‌عه‌بادی كردبوو، رێگای بدات هێرش بكات سه‌ر كه‌ركوك.
كوردستان تیڤی: رزگار تاهیر
کۆمێنت (0)
تا ئێستا هیچ کۆمێنتێک نەکراوە.