به‌رپرسی ئه‌نجومه‌نی سه‌ركردایه‌تی كه‌ركووك - گه‌رمیانی پارتی رایده‌گه‌ێنێت، بڕیار درا كه‌ركووك له شاره‌كانی دیكه‌ی هه‌رێمی كوردستان دانه‌بڕێت و سبه‌ی له‌گه‌ڵ سه‌رجه‌م شاره‌كانی دیكه‌دا تێیدا ڕیفراندۆم ئه‌نجام ده‌درێت.
سه‌لاح ده‌لۆ، به‌رپرسی ئه‌نجومه‌نی سه‌ركردایه‌تی كه‌ركووك - گه‌رمیانی پارتی، به باسنیوزی ڕاگه‌یاند: كۆبوونه‌وه‌كه‌ی ئه‌مڕۆ یه‌كشه‌ممه 24/9/2019 كۆبوونه‌وه‌یه‌كی هاوبه‌ش بوو له نێوان یه‌كێتی و پارتی و یه‌كگرتوو، ئامانجی كۆبوونه‌وه‌كه‌ش له‌سه‌ر بابه‌تی ڕیفراندۆم له شاری كه‌ركووك بوو، گوایه براده‌رانی یه‌كێتی و به‌تایبه‌ت مه‌ڵبه‌ندی (2)ی یه‌كێتی له كه‌ركووك له‌گه‌ڵ دواخستنی پرۆسه‌ی ڕیفراندۆمبوون له شاره‌كه.
به‌رپرسه‌كه‌ی پارتی گوتی: به ده‌نگی زۆرینه‌ی لایه‌نه‌كان، دواخستنی ڕیفراندۆم له شاری كه‌ركووك ڕه‌ت كرایه‌وه، بڕیاره‌كه‌ش هی سه‌ركردایه‌تیی سیاسیی كوردستانه، بڕیار دراوه كه كه‌ركووك له شاره‌كانی دیكه‌ی هه‌رێمی كوردستان دانه‌بڕێت و سبه‌ی له‌گه‌ڵ سه‌رجه‌م شاره‌كانی دیكه‌دا تێیدا ڕیفراندۆم ئه‌نجام ده‌درێت.
كوردستان تیڤی: رزگار تاهیر
کۆمێنت (0)
تا ئێستا هیچ کۆمێنتێک نەکراوە.