به‌رپرسێكی حكومه‌تی هه‌رێمی كوردستان رایده‌گه‌ێنێت، دادگای فیدراڵی عێراق بێلایه‌نی خۆی له‌ده‌ستداوه و به سیاسی كراوه .
سه‌فین دزه‌یی گوته‌بێژی حكوومه‌تی هه‌رێمی كوردستان، رایگه‌یاند: رێز له ئه‌ندامانی دادگای باڵا ده‌گرین و به‌ڵام پێمانوایه بڕیارێكی بێلایه‌ن له باره‌ی سه‌ربه‌خۆیی كوردستان نه‌دراوه. چونكه چه‌ندین ساڵه دۆسیه‌مان پێشكه‌ش به‌و دادگایه كردووه، به‌ڵام زۆربه‌ی دۆسیه گرنگه‌كانی وه‌رنه‌گرتووه. كه‌چی له‌وباره‌یه‌وه بڕیارێكی خێرای وه‌رگرت.
سه‌فین دزه‌یی گوتیشی: پێویسته هه‌ر بڕیارێك یاخود یاسایه‌ك كه له په‌رله‌مانی كوردستان ده‌رده‌چێت، ده‌بێت له دادگای فیدراڵی بناسرێت. دادگای فیدراڵی بێلایه‌نی خۆی له‌ده‌ستداوه و كراوه به سیاسی.
سه‌فین دزه‌یی راشیگه‌یاند: زۆر به باشی نیگه‌رانییه‌كانی كۆمه‌ڵگه‌ی نێوده‌وڵه‌تی به تایبه‌تی وڵاتانی دراوسێ له‌مه‌ڕ گشتپرسی تێده‌گه‌ین. له‌م ساڵانه‌ی دواییدا به تایبه‌تی له‌گه‌ڵ توركیا به سایه‌ی په‌یوه‌ندییه‌كانمان پێشكه‌وتنێكی گه‌وره له رووی سیاسی و ئابووری هاته ئاراوه. له راستیدا خوازیاری تێكچوونی ئه‌م په‌یوه‌ندییانه ناكه‌ین. بۆ دیالۆگ ده‌رگامان به رووی به‌غدا، كۆمه‌ڵگه‌ی نێوده‌وڵه‌تی و وڵاتانی دراوسێ دانه‌خستووه.
كوردستان تیڤی: ئا/ رزگار تاهیر
کۆمێنت (0)
تا ئێستا هیچ کۆمێنتێک نەکراوە.