دەستەی دەستپاکیی عێراق ئاشكرای كرد كە لە پارێزگای کەرکووک سێ تۆمەتباریان بە تۆمەتی گەندەڵی و وەرگرتنی بەرتیل و فێڵكردن لە هاووڵاتییان دەستگیركردووە.
دەستەكە ئەمڕۆ یەكشەممە لە راگەیەنراوێكدا بڵاوی كردەوە: تیمەکانی دەستەی دەستپاکی فێڵێکی ڕێکخراویان لە بەڕێوەبەرایەتیی خانەنشینی کەرکووک ئاشکرا کرد، بەهۆی ئەمەوە دوو کەس دەستگیرکران کە فێڵیان لە پەڕاوە خانەنشینییەکان کردبوو و بەبێ هیچ مافێک دەستیان بەسەر بڕی زیاتر لە 84 ملیۆن دیناری مووچەی کەڵەکەبووی خانەنشینیی هاووڵاتییەکدا گرتبوو.
هەروەها بڵاوی كردەوە: تیمەكانی لێکۆڵینەوەی دەستەی دەستپاكی هەر لە كەركووك، کارمەندێکی بەڕێوەبەرایەتیی پۆلیسیان دەستگیركرد كە لەبەرامبەر وەرگرتنی بڕێك پارە، كاری گواستنەوەی ڕاگیراوان و دەستگیركراوانی لە گرتووخانەیەك بۆ گرتووخانەیەكی دیكە دەكرد.
دەستەكە ئاماژەی بەوەشدا كە دادوەری لێکۆڵینەوەی کەرکووک تایبەت بە دۆسیەکانی دەستپاکی، بڕیاریدا بە دەستگیركردنی هەرسێ تۆمەتبارەكە بە پشتبەستن بە ماددەکانی 289 و 298 لە یاسای سزادانی عێراقی.
کۆمێنت (0)
تا ئێستا هیچ کۆمێنتێک نەکراوە.