بەهۆی پێشبینییەکانی کەشوهەوا بۆ هاتنی شەپۆلێکی بارانبارینی بەهێز بۆ ناوچە جیاوازەکانی هەرێمی کوردستان، سەرۆکایەتیی شارەوانیی سلێمانی ڕایگەیاند، سەرجەم تیمە خزمەتگوزاری و فریاگوزارییەکانیان بۆ ڕووبەڕووبوونەوەی هەر ئەگەرێکی نەخوازراو خستووەتە حاڵەتی ئامادەباشیی تەواوەوە.
شارەوانیی سلێمانی ئاماژەی بەوە کردووە، لەپێناو کەمکردنەوەی مەترسییەکانی کۆبوونەوەی ئاو و دروستبوونی لافاو، بە هاوکاریی بۆردی کۆکردنەوەی خۆڵ و خاشاک و کۆمپانیاکان، هەڵمەتێکی فراوانیان بۆ پاککردنەوەی مەنهۆل، ئاوەڕۆ و کەناڵەکانی ڕێڕەوی ئاو لە شەقامە سەرەکییەکان، کۆڵانەکان و شوێنە گشتییەکان ئەنجام داوە و سەرجەم ئامادەکارییە پێویستەکانیان گرتووەتەبەر.
سەرۆکایەتیی شارەوانیی سلێمانی داوا لە هاووڵاتیان دەکات پابەندی ڕێنماییەکانی پاراستن بن، ڕاشیگەیاند: تیمەکانمان بە شێوەی 24 کاتژمێری لە خزمەت و ئامادەباشیدان بۆ پاراستنی سەلامەتی و ئارامیی هاووڵاتیان.
هەروەها شارەوانیی سلێمانی داوای لە هاووڵاتیان کرد، لە کاتی هەر حاڵەتێکی نەخوازراو یان پێویستبوون بە یارمەتیی بەپەلە، ڕاستەوخۆ پەیوەندی بە هێڵی گەرمی فریاکەوتنی (JCC) بە ژمارە 100 بکەن.
کۆمێنت (0)
تا ئێستا هیچ کۆمێنتێک نەکراوە.