درەنگانی شەوی ڕابردوو ڕووداوێکی هاتوچۆ لە شاری هەولێر ڕوویدا و تێیدا بارهەڵگرێکی سووتەمەنی دوای وەرگەڕانی ئاگری گرت و بووە هۆی گیانلەدەستدانی شۆفێرەکەی.
بەپێی زانیارییەکانی بەڕێوەبەرایەتیی بەرگریی شارستانیی هەولێر، کاتژمێر 12:52 خولەکی بەرەبەیانی ئەمڕۆ، تیمەکانی بەرگریی شارستانی ئاگادار کراونەتەوە لە وەرگەڕان و سووتانی بارهەڵگرێکی گواستنەوەی سووتەمەنی لەسەر شەقامی 120 مەتری لە بەرانبەر باڵەخانەکانی "جیهان ستی".
تیمەکانی بەرگریی شارستانیی پارێزگای هەولێر دەستبەجێ گەیشتنە شوێنی ڕووداوەکە و توانییان لە ماوەیەکی کورتدا ئاگرەکە کۆنترۆڵ بکەن و ڕێگری لە تەشەنەسەندنی زیاتری بگرن، بەڵام بەهۆی توندیی پێکدادانەکە و ئاگرەکەوە، شۆفێری بارهەڵگرەکە گیانی سپارد.
لە ئێستادا تەرمی شۆفێرەکە ڕەوانەی پزیشکی دادی هەولێر کراوە بە مەبەستی ئەنجامدانی پشکنین و تەواوکردنی ڕێکارە یاساییەکان. پۆلیسی هاتوچۆش لێکۆڵینەوەی لە هۆکاری وەرگەڕانی ئۆتۆمبێلەکە دەست پێ کردووە.
کۆمێنت (0)
تا ئێستا هیچ کۆمێنتێک نەکراوە.