لە پەرەسەندنێکی نوێدا لە ناوچە جێناکۆکەکان، هێزەکانی سوپای عێراق دەستیان بەسەر بڕی 300 دۆنم زەویی کشتوکاڵیی جوتیارانی گوندی "تۆپزاوە" لە پارێزگای کەرکووکدا گرت، ئەمەش شەپۆلێکی نوێی لە ناڕەزایەتی لای دانیشتووانی ناوچەکە دروست کردووە.
بەپێی زانیارییە مەیدانییەکان، یەکەکانی سوپای عێراق چوونەتە ناو زەوییە کشتوکاڵییەکانی گوندی تۆپزاوە و ڕێگرییان لە جوتیاران کردووە کارەکانیان ئەنجام بدەن. جوتیارانی ناوچەکە، کە زۆربەیان کوردن، جەخت لەوە دەکەنەوە کە خاوەنی یاسایی و مێژوویی ئەو زەوییانەن و بەڵگەنامەی فەرمییان (تاپۆ) لەبەردەستدایە، بەڵام سوپا بە پاساوی جیاواز دەیەوێت دەست بەسەر زەوییەکانیاندا بگرێت.
یەکێک لە جوتیارانی زیانلێکەوتوو لە لێدوانێکدا ڕایگەیاند: "ئەمە هەوڵێکی ئاشکرایە بۆ نان بڕاوکردنی ئێمە و داگیرکردنی خاکەکەمان. ئەم زەوییانە تەنها سەرچاوەی بژێوی دەیان خێزانی ئەم گوندەن و ئێمە بە هیچ شێوەیەک دەستبەرداری مافەکانمان نابین." جوتیاران داوا لە حکوومەتی فیدراڵ و لایەنە پەیوەندیدارەکان دەکەن دەستبەجێ دەستوەردان بکەن بۆ ڕاگرتنی ئەم "پێشێلکارییە".
دۆسیەی زەوییە کشتوکاڵییەکانی کەرکووک و دەوروبەری، یەکێکە لە کێشە هەرە ئاڵۆز و هەستیارەکان. جوتیارانی کورد و تورکمان بەردەوام هێزە ئەمنییەکان و وەزارەتی بەرگریی عێراق تۆمەتبار دەکەن بە هەوڵدان بۆ زیندووکردنەوەی بڕیارەکانی سەردەمی ڕژێمی پێشوو و دەستبەسەرداگرتنی زەوییەکانیان بە مەبەستی سەربازی یان گۆڕینی دیمۆگرافیای ناوچەکە.
تاوەکو ئێستا فەرماندەیی ئۆپەراسیۆنە هاوبەشەکانی کەرکووک هیچ ڕوونکردنەوەیەکی فەرمیی لەسەر هۆکاری جێگیربوونی هێزەکان لە ناو زەوییەکانی تۆپزاوە بڵاونەکردووەتەوە. چاودێرانی سیاسی هۆشداری دەدەن کە بەردەوامیی ئەم جۆرە ئاڵۆزییانە دەبێتە هۆی تێکچوونی پێکەوەژیان و سەقامگیری لە پارێزگای کەرکووکدا، لە کاتێکدا کە ناوچەکە پێویستی بە هێورکردنەوەی بارگرژییەکان هەیە.
کۆمێنت (0)
تا ئێستا هیچ کۆمێنتێک نەکراوە.