لە هاوینەهەواری ئەحمەدئاوا لە سنووری پارێزگای هەڵەبجە، بەهۆی تێکچوونی پەڕەشووتێکی جۆری پارالایدەر، 2 کەس کەوتنە خوارەوە و بە سەختی بریندار بوون.
ئەڤین عەتا پەیامنێری (کوردستان تیڤی): هەردوو کەسەکە پێکەوە لەسەر یەک پەڕەشووت بوون و دوای تێکچوونی پەڕەشووتەکەیان، لە بەرزاییەوە کەوتوونەتە خوارەوە. دەستبەجێ دوای ڕووداوەکە، بریندارەکان گواستراونەتەوە بۆ نەخۆشخانەی "عەلی شیعە" لە شارەدێی خورماڵ بە مەبەستی وەرگرتنی چارەسەری خێرا.
هاوکار ئیبراهیم، بەڕێوەبەری نەخۆشخانەی عەلی شیعە لە خورماڵ، لە لێدوانێکی تایبەتدا ڕایگەیاند: هەردوو بریندارەکە تووشی شکاوی بوون، یەکێکیان برینەکەی زۆر سەختە و بەهۆی بەهێزیی کەوتنەکەیەوە تووشی خوێنبەربوونی مێشک بووە.
لە ئێستادا تیمە پزیشکییەکان لە هەوڵی بەردەوامدان بۆ جێگیرکردنی دۆخی تەندروستیی بریندارەکان و لەژێر چاودێریی وردی پزیشکیدا ماونەتەوە.
کۆمێنت (0)
تا ئێستا هیچ کۆمێنتێک نەکراوە.