گوتەبێژی حكوومەتی عێراق ئاشكرای كرد، سبەی پێنجشەممە عەلی فالح زەیدی سەرۆك وەزیرانی عێراق بە داوەتنامەیەكی فەرمی، سەردانی كۆماری ئیسلامیی ئێران دەكات.
حەیدەر عەبوودی گوتەبێژی حكوومەتی عێراق ئەمڕۆ چوارشەممە لە كۆنگرەیەكی ڕۆژنامەوانی رایگەیاند: سبەی پێنجشەممە عەلی فالح زەیدی سەرۆك وەزیرانی عێراق لەگەڵ شاندێكی باڵای حكوومەتی عێراق، سەردانی ئێران دەكات.
راشیگەیاند: بەدڵنیاییەوە لەمیانەی سەردانەكەدا گفتوگۆ و لێكتێگەیشتنی هاوبەش لەنێوان هەردوو وڵاتدا ئەنجام دەدرێت بەتایبەت لە بواری بەهێزكردنی هاوكارییەكان لە بوارەكانی بازرگانی، گواستنەوە و كشتوكاڵ دەكرێتەوە، هەروەها لە كۆبوونەوەكاندا تاوتوێی پرس و دۆسیەی غازیش دەكرێت.
گوتەبێژی حكوومەتی عێراق لە كۆنگرەكەدا ئاشكراشی كرد كە كۆتایی ئەم مانگە سەرۆك وەزیرانی عێراق هەروەها سەردانی وڵاتی توركیاش دەكات و لەگەڵ رەجەب تەیب ئەردۆغان سەرۆك كۆمار و بەرپرسانی باڵای توركیا كۆدەبێتەوە.
ئەمە لەكاتێكدایە كە هەفتەی رابردوو عەلی فالح زەیدی سەردانی ئەمریكای كرد و لە كۆشكی سپی لەگەڵ دۆناڵد ترەمپ سەرۆكی ئەو وڵاتە كۆبووەوە، هەر لەو سەردانەدا چەندین رێككەوتن و یاداشتنامە لەنێوان بەغدا و واشنتۆن ئەنجامدرا.
کۆمێنت (0)
تا ئێستا هیچ کۆمێنتێک نەکراوە.