ئەنجوومەنی باڵای دادوەریی عێراق بە فەرمی فەرمانی دا بە دەستپێکردنی لێکۆڵینەوەیەکی ورد و فراوان لە دۆسیەی دیارنەمانی 140 ملیار دۆلار لە داهاتە گشتییەکانی وڵات لە ماوەی سێ ساڵی ڕابردوودا.
محەمەد جاسم خەفاجی ئەندامی پەرلەمانی عێراق ئەمڕۆ سێشەممە ڕایگەیاند کە ئەنجوومەنی باڵای دادوەری لایەنە پەیوەندیدارەکانی ڕاسپاردووە بۆ بەدواداچوونی چارەنووسی ئەو بڕە پارە زەبەلاحەی کە لە داهاتەکانی عێراقدا دیار نەماوە و هیچ سەرچاوەیەکی فەرمیی خەرجکردنی نییە.
خەفاجی لە بەیاننامەیەکدا ئاماژەی بەوە کرد کە پێشتر و لە 27ی حوزەیرانی ڕابردوودا، نووسراوێکی فەرمیی ئاراستەی دەزگای داواکاری گشتی کردووە و تێیدا داوای لێکۆڵینەوەی کردووە لەسەر نادیاریی هۆکارەکانی خەرجکردنی 140 ملیار دۆلار لە سێ ساڵی کۆتایی تەمەنی حكوومەتدا، کە تاوەکو ئێستا ڕوون نییە ئەو بڕە پارەیە لە چ بوارێکدا بەکار هێنراوە.
ئەم دۆسیەیە کە بە یەکێک لە گەورەترین دۆسیەکانی گەندەڵی و بەفیڕۆدانی سامانی نیشتمانی لە مێژووی عێراقدا دادەنرێت، کاردانەوەی زۆری لە ناوەندە سیاسی و جەماوەرییەکاندا لێ کەوتووەتەوە. پەرلەمانتارەکە جەختی کردەوە کە ئەم بڕە پارە زەبەلاحە بەشێکی سەرەکیی داهاتە نیشتمانییەکان بووە و دیارنەمانی بەم شێوەیە نیشانەی بوونی کەلێنێکی گەورەی دارایی و کارگێڕییە لە ناو دامەزراوەکانی دەوڵەتدا.
عێراق کە ساڵانە داهاتێکی زۆری لە هەناردەکردنی نەوت دەست دەکەوێت، هێشتا بەدەست نەبوونی خزمەتگوزارییە سەرەتاییەکان و داڕمانی ژێرخانەوە دەناڵێنێت، ئەمەش گومانەکان بۆ سەر بوونی گەندەڵییەکی ڕێکخراو لە ناو جومگەکانی حكوومەتدا زیاتر دەکات.
چاودێرانی سیاسی پێیانوایە کە ئەم جوولە دادوەرییە لە کاتێکی هەستیاردا دێت، بەتایبەتی کە ئیدارەی ترەمپ لە واشنتۆن و دامەزراوە داراییە نێودەوڵەتییەکان بەردەوام فشاریان خستووەتە سەر بەغدا بۆ پەیڕەوکردنی شەفافییەت و چاکسازیی ڕیشەیی لە کەرتی داراییدا.
لێکۆڵینەوە لەم 140 ملیار دۆلارە تاقیکردنەوەیەکی گەورە دەبێت بۆ سەربەخۆیی دەزگای دادوەریی عێراق تاوەکو بتوانێت بەرپرسانی پشت ئەم دۆسیەیە ئاشکرا بکات و متمانە بۆ پرۆسەی سیاسی و کارگێڕیی وڵات بگێڕێتەوە، لە کاتێکدا جەماوەری ناڕازی داوای گەڕاندنەوەی پارە دزراوەکان بۆ خەزێنەی گشتی دەکەن تاوەکو لە پڕۆژەکانی بونیادنانەوەدا خەرج بکرێن.
کۆمێنت (0)
تا ئێستا هیچ کۆمێنتێک نەکراوە.