دەستەی دەسپاکیی عێراق ڕایگەیاند، شەش فەرمانبەری دەروازەی گومرگیی دارەمان لە نێوان پارێزگای کەرکووک و هەولێر، بە تۆمەتی وەرگرتنی بەرتیل و سەرانەوەرگرتن لە هاووڵاتییان دەستگیر کران.
ئەمڕۆ سێشەممە 14ـی تەمووز، دەستەی دەسپاکیی فیدراڵ، لە ڕاگەیەندراوێکدا بڵاویکردەوە، تیمەکانی نووسینگەی لێکۆڵینەوەی کەرکووک، پاڵپشت بە بڕیارێکی دادوەر و لە ئۆپەراسیۆنێکی هاوبەشدا لەگەڵ دەزگای ئاسایشی نیشتمانی، توانیویانە شەش فەرمانبەری دەروازەی گومرگیی (دارەمان) لەسەر ڕێگای سەرەکیی نێوان پارێزگای کەرکووک و هەولێر دەستگیر بکەن.
دەستەی دەستپاکی ئاماژەی بەوە کردووە، تۆمەتبارانی دەستگیرکراو کاری سەرانەسەندن و باجگیریان بەرامبەر بە هاووڵاتییان ئەنجام داوە و بە ئەنقەست مامەڵە گومرگییەکانیان بۆ ڕایی نەکردوون، هەرچەندە مامەڵەکانیان یاسایی و ڕێکوپێک بوون، تەنیا کاتێک کارەکانیان بۆ ڕایی کردوون کە ناچاریان کردوون پارەیان پێ بدەن.
لە کۆتایی ڕاگەیەندراوەکەی دەستەی دەسپاکیدا هاتووە: تۆمەتباران بەپێی یاسای ژمارە 160ـی ساڵی 1983 لە یاسای سزادان، ڕەوانەی بەردەم دادوەری لێکۆڵینەوەی تایبەتمەند کراون، تاوەکو ڕێکاری یاسایی پێویستیان بەرامبەر بگیرێتە بەر.
کۆمێنت (0)
تا ئێستا هیچ کۆمێنتێک نەکراوە.