ئاژانسی هەواڵی "مێهر"ی ئێرانی ڕایگەیاند، دەنگی تەقینەوەیەکی بەهێز لە شاری بەندەر عەباسی باشووری وڵاتەکە بیستراوە. تاوەکو ئێستا هۆکاری تەقینەوەکە و قەبارەی زیانە گیانی و ماددییەکان لە لایەن سەرچاوە فەرمییەکانی حکوومەتی ئێرانەوە ئاشکرا نەکراوە.
شاری بەندەر عەباس بەهۆی هەڵکەوتە جوگرافییەکەیەوە لەسەر گەرووی هورمز، یەکێکە لە ناوەندە هەرە گرنگە بازرگانی و سەربازییەکانی ئێران و بنکەیەکی گەورەی دەریایی سوپای لێیە. ئەم ڕووداوە لە کاتێکدایە کە ناوچەکە لە بارودۆخێکی زۆر هەستیار و پڕ لە گرژیدایە، بەتایبەت دوای ئەوەی دۆناڵد ترەمپ، سەرۆکی ئەمریکا، هۆشداریی دابوو لە ئەگەری وەشاندنی گورزی سەربازی بۆ سەر ئامانجە ئێرانییەکان لە وەڵامی تێکدانی ئاسایشی دەریاوانی.
هێزە ئەمنییەکان و تیمەکانی فریاگوزاری لە ناو شاری بەندەر عەباس لە حاڵەتی ئامادەباشیدان، و چاوەڕوان دەکرێت لە کاتژمێرەکانی داهاتوودا زانیاریی وردتر لەسەر سروشتی ڕووداوەکە و سەرچاوەی تەقینەوەکە بڵاو بکرێتەوە. ئەمە لە کاتێکدایە کە لە چەند ڕۆژی ڕابردوودا چەندین ڕووداوی ئەمنی لە ڕێڕەوە ئاوییەکانی ناوچەکەدا تۆمار کراون، کە بوونەتە هۆی توندبوونەوەی زیاتری ململانێکانی نێوان تاران و واشنتن.
کۆمێنت (0)
تا ئێستا هیچ کۆمێنتێک نەکراوە.