مایک پێنس، جێگری پێشووی سەرۆکی ئەمریکا، ڕایگەیاند کە لادانی ئەو سزایانەی بەهۆی کڕینی سیستەمی S-400 ی ڕووسییەوە لە ساڵی 2017دا بەسەر تورکیادا سەپێنرابوون، "هەڵەیەکی ستراتیژیی گەورەیە".
پێنس لە پەیامێکدا کە ئاراستەی دۆناڵد ترەمپ، سەرۆکی ئەمریکای کردووە، داوای لێکردووە ڕێگە بۆ دابینکردنی فڕۆکەی جەنگیی F-35 بۆ ئەنقەرە خۆش نەکات، چونکە ئەم هەنگاوە ئاسایشی ویلایەتە یەکگرتووەکان، ئیسرائیل و هاوپەیمانی ناتۆ دەخاتە مەترسییەوە.
پێنس لە پلاتفۆرمی "X" بە ڕاشکاوی نووسیویەتی: "جەنابی سەرۆک، تکایە ئەو کارە مەکە." ئەم هۆشدارییەی پێنس لە کاتێکدایە کە ترەمپ لە ئەنقەرە ئارەزووی خۆی نیشان داوە بۆ تاوتوێکردنی فرۆشتنی ئەو فڕۆکە پێشکەوتووانە بە حکوومەتی تورکیا. پێنس پێیوایە کە ئەم بڕیارە نەک هەر زیان بە هاوپەیمانییە سەربازییەکان دەگەیەنێت، بەڵکو دەبێتە هۆی لاوازکردنی پێگەی ئەمنی ئەمریکا و هاوپەیمانەکانی لە ناوچەکەدا.
ململانێی فرۆشتنی چەک بە تورکیا یەکێکە لە دۆسیە هەرە هەستیارەکانی نێوان واشنتن و ئەنقەرە، کە لە ساڵی 2017ەوە و دوای ئەوەی تورکیا بڕیاری دا سیستەمی بەرگریی ڕووسی بکڕێت، تووشی ئاڵۆزییەکی زۆر بووە. لێدوانەکەی پێنس نیشانەی بوونی ناڕەزایەتییە لە ناوخۆی ئەمریکادا بەرامبەر بەو نەرمییەی کە ترەمپ بەرامبەر بە داواکارییەکانی تورکیا نیشانی دەدات، ئەمەش لە کاتێکدایە کە ئیسرائیلیش بە توندی دژی هەر جۆرە ڕێککەوتنێکی لەو شێوەیەیە.
کۆمێنت (0)
تا ئێستا هیچ کۆمێنتێک نەکراوە.