دەوحە ئەمڕۆ سێشەممە تارانی بە بەرپرسیار لەو هێرشەی کە دوێنێ دووشەممە کرایە سەر کەشتییەکی نەوتهەڵگری قەتەری لە کاتی تێپەڕبوونی بە گەرووی هورمزدا تۆمەتبار کرد.
ماجد ئەنساری گوتەبێژی وەزارەتی دەرەوەی قەتەر داوای لە ئێران کرد کە کۆتایی بە هەڕەشەکانی بۆ سەر دابینکردنی وزەی جیهانی لەو ڕێڕەوە ئاوییە هەستیار و زیندووەدا بهێنێت.
ماجد ئەنساری لە ڕێگەی نووسراوێکەوە لە تۆڕی كۆمەڵایەتی (ئێكس) ڕایگەیاند: داوا لە کۆماری ئیسلامیی ئێران دەکەین بە زووترین کات هەموو ئەو ڕەفتارانە ڕابگرێت کە دەبنە هۆی تێکدانی ئاسایشی ناوچەکە یان هەڕەشە لە سەلامەتیی دەریاوانی نێودەوڵەتی دەکەن." وتەبێژەکە جەختی لەوەش کردەوە کە پێویستە تاران واز لە خستنە مەترسیی دابینکردنی وزەی جیهانی و تواناکانی وڵاتانی ناوچەکە بهێنێت بۆ خزمەتکردنی "ژمارە و بەرژەوەندییە تەسکەکان"، هاوکات قەتەر ئێرانی بە بەرپرسیاری تەواوەتی یاسایی ئەم دەستدرێژییە و هەموو ئەو زیان و دەرهاویشتانە دەزانێت کە لەم ڕووداوە دەکەونەوە.
ئەم گرژییە نوێیەی نێوان دەوحە و تاران لە کاتێکدایە کە گەرووی هورمز یەکێکە لە گرنگترین ڕێڕەوە ئاوییەکانی جیهان بۆ گواستنەوەی وزە، و هەر جۆرە تێکچوونێکی ئەمنی تێیدا کاریگەریی ڕاستەوخۆی لەسەر بازاڕەکانی جیهان و سەقامگیریی حکوومەتەکانی ناوچەکە دەبێت.
تائێستا بەرپرسانی تاران هیچ وەڵامێکی فەرمییان بۆ ئەم تۆمەتانەی قەتەر نەبووە، بەڵام ئەم ڕووداوە دەکرێت ببێتە هۆی ئاڵۆزبوونی زیاتری پەیوەندییە دیپلۆماسییەکانی نێوان هەردوو وڵات و زیاتربوونی ئامادەیی هێزە دەریاییە نێودەوڵەتییەکان لە ناوچەکەدا بۆ پاراستنی ئاسایشی کەشتییە بازرگانییەکان.
کۆمێنت (0)
تا ئێستا هیچ کۆمێنتێک نەکراوە.