ئەمڕۆ دووشەممە بەهۆی رێگریكردن لە دوورینەوەی گەنمەكانیان، گرژی و ئاڵۆزی لەنێوان كریستیانەكانی تلسقۆف و هێزەكانی حەشدی شەعبی دروستبوو و بەهۆیەوە چەند كاتژمێرێك رێگەی نێوان تلسقۆف و مووسڵ داخرا.
هێزەكانی حەشدی شەعبی رێگەیان لە جوتیارانی كریستیان تلسقۆف گرت بۆ ئەوەی بەرهەمی گەنمەكانیان بدوورنەوە، بەهۆیەوە گرژی و ئاڵۆزی لەنێوان هەردوولا دروستبوو.
لە ئەنجامی دروستبوونی گرژی و ئاڵۆزییەكە ئاگر لە دەڕاسەیەك و رێژەیەكی زۆری گەنمی جوتیاران كەوتەوە، تەنانەت هێزەكانی حەشدی شەعبی ڕێگرییان لە ئۆتۆمبێلەكانی ئاگركوژێنەوەش گرت بەهانای جوتیارەكانەوە بچن.
بەهۆی ئەم ڕووداوانە جوتیارانی ناوچەكە خۆپیشاندانیان ئەنجام دا و لە ئەنجامدا بۆ ماوەی 3 كاتژمێر رێگەی نێوان تلسقۆف و مووسڵ داخرا.
دواتر شاندێكی سەربازی لە ژووری عەمەلیاتی شاری مووسڵ و نوێنەری پارێزگای نەینەوا و بەڕێوەبەری پۆلیسی مووسڵ و قایمقامی تلكێف گەیشتنە شوێنی رووداوەكە، دوای كۆبوونەوە لەگەڵ بەشێك لە جوتیارەكان، بەڵێنیان پێدان كێشەكەیان چارەسەر بكەن، بەڵام تا ئامادەكردنی ئەم هەواڵە كێشەكان هەروەك خۆیان ماونەتەوە و تا ئێستا چارەسەر نەكراون.
ڤیدیۆ.. ساتی سوتانی دەڕاسەكەی جوتیارانی تلسقۆف:-
کۆمێنت (0)
تا ئێستا هیچ کۆمێنتێک نەکراوە.