شانەی راگەیاندنی ئەمنیی عێراق، روونكردنەوە لەبارەی دەنگۆی دابەزینی هێز لە بیابانەكانی نەجەف و كەربەلا بڵاو دەكاتەوە و ئاماژە بەوە دەكات كە رووداوەكە دوو مانگ بەر لە ئێستا روویداوە و قوربانیشی لێ كەوتووەتەوە.
سەعد میعەن سەرۆكی شانەی راگەیاندنی ئەمنیی عێراق ئەمرۆ یەكشەممە لە راگەیەنراوێكدا رایگەیاند: لە رۆژانی رابردوو چەند پەیج و دەزگایەكی راگەیاندن هەواڵ و ڤیدیۆی دابەزینی هێزیان لە رۆژهەڵاتی نوخێب لە بیابانی كەربەلا و هەروەها نەجەف بڵاو كردۆتەوە، لای خۆمانەوە رایدەگەیەنین كە رووداوەكە ئێستا نەبووە و بەڵكو لە 5ی ئاداری رابردوو روویداوە.
راشیگەیاند: ئەو كات هێزە ئەمنییەكانی عێراق چووبوونە شوێنی دابەزینی هێزەكان و رووبەڕووبوونەوە لەگەڵ ئەو هێزە نەزانراو و رێگەپێنەدراوە روویدابوو، لە ئەنجامی رووبەڕووبوونەوەكان دوو ئەندامی هێزە ئەمنییەكان كوژرابوون.
سەعد میعەن هەروەها رایگەیاند: دوای رووداوەكە، هێزە ئەمنییەكان لە مانگەكانی نیسان و ئایاری رابردوودا چەند جارێك ناوچە بیابانییەكانیان پشكنیووە و هیچ هێزێكی بیانی بەدی نەكراوە.
سەرۆكی شانەی راگەیاندنی ئەمنیی عێراق جەختیشی كردەوە كە هێزە ئەمنییەكان ئەركەكانیان بەتەواوەتی جێبەجێكردووە و تەئكیدیش دەكاتەوە كە ئێستا هیچ هێزێكی بیانی لە خاكی عێراق بوونی نییە.
کۆمێنت (0)
تا ئێستا هیچ کۆمێنتێک نەکراوە.