سێر دەیڤد ئاتنبۆرۆ، کە بە ڕووخسار و دەنگی جیهانیی بەرنامەکانی مێژووی سروشت دادەنرێت، ئەمڕۆ پێ دەنێتە سەدەمین ساڵی تەمەنییەوە، دوای کاروانێکی پڕ لە داهێنان کە زیاتر لە 7 دەیەی خایاندووە.
ئەمڕۆ یادی 100 ساڵەی تەمەنی سێر دەیڤد ئاتنبۆرۆیە؛ ئەو کەسایەتییەی کە بۆ ماوەی 7 دەیەیە نەک تەنها وەک پێشکەشکارێکی دیار، بەڵکو وەک داهێنەرێکی لێهاتوو و ژیری بواری ڕاگەیاندن ناسراوە. ئاتنبۆرۆ لە کاروانە پیشەییەکەیدا توانی سەرجەم سنوورەکان تێپەڕێنێت و شێوازێکی نوێ بۆ پەخشی مۆدێرن و بەرنامە دۆکیۆمێنتارییەکان دابڕێژێت.
ئاتنبۆرۆ لە ماوەی کارکردنیدا، بووەتە پردی پەیوەندی نێوان مرۆڤ و ژینگەی کێوی، لە ڕێگەی کارە ناوازەکانییەوە وێنەیەکی ورد و زانستییانەی بۆ مێژووی سروشت و گۆڕانکارییەکانی سەر زەوی پێشکەش بە جیهان کردووە. شارەزایان ئاماژە بەوە دەکەن کە ئەو تەنها گێڕانەوەی بۆ سروشت نەکردووە، بەڵکو شۆڕشێکی لە تەکنەلۆژیا و شێوازی گەیاندنی زانیاری لە ڕاگەیاندنی جیهانیدا بەرپا کردووە.
سێر دەیڤد ئاتنبۆرۆ، تا ئێستاش وەک یەکێک لە کاریگەرترین کەسایەتییەکانی سەدە دەمێنێتەوە، کە توانیویەتی لە ڕێگەی شاشەکانەوە هۆشیارییەکی قووڵی ژینگەیی لای ملیۆنان مرۆڤ لە سەرانسەری جیهان دروست بکات و ببێتە پارێزەرێکی سەرسەختی سروشت و ژیانی سەر گۆی زەوی.
کۆمێنت (0)
تا ئێستا هیچ کۆمێنتێک نەکراوە.