وەزارەتی دەرەوەی سویسرا ڕایگەیاند کە وڵاتەکەیان ئامادەیە جارێکی دیکە ببێتە شوێنی بەڕێوەچوونی دانوستانەکانی نێوان تاران و واشنتن بۆ چارەسەرکردنی کێشە هەڵپەسێردراوەکانی نێوانیان.
لە لێدوانێکدا بۆ ئاژانسی "تاس"ی ڕووسی، وەزارەتی دەرەوەی سویسرا جەختی لەوە کردەوە کە وەک وڵاتێکی بێلایەن، دەرگایان کراوەیە بۆ میوانداریکردنی هەر گفتوگۆیەکی نوێ لە نێوان ئەمریکا و ئێران. ئەم هەنگاوە بەشێکە لە هەوڵە بەردەوامەکانی بێرن بۆ دابینکردنی ژینگەیەکی گونجاو بۆ دیپلۆماسی و کەمکردنەوەی ئاڵۆزییەکانی نێوان هەردوو وڵات لە ناوچەکەدا.
سویسرا لە دوای ساڵی 1980ـەوە وەک پارێزەری بەرژەوەندییەکانی ئەمریکا لە ئێران کار دەکات و ڕۆڵێکی سەرەکی لە گواستنەوەی پەیامە سیاسییەکان و ئاڵوگۆڕی زیندانییەکانی نێوان هەردوو وڵاتدا بینیوە. ئەم ئامادەییە نوێیەش لەکاتێکدایە کە هەوڵە نێودەوڵەتییەکان بۆ زیندووکردنەوەی کەناڵە دیپلۆماسییەکان و چارەسەرکردنی دۆسیە ئاڵۆزەکان بەردەوامن.
کۆمێنت (0)
تا ئێستا هیچ کۆمێنتێک نەکراوە.