وەزارەتی بەرگریی دەوڵەتی ئیمارات لە ڕاگەیەندراوێکی بەپەلەدا ئاشکرای کرد، کە سیستەمەکانی بەرگریی ئاسمانیی وڵاتەکە بە سەرکەوتوویی بەرپەرچی چەند مووشەک و فڕۆکەیەکی بێفڕۆکەوانی (درۆن) ئێرانییان داوەتەوە کە ئاسمانی وڵاتەکەیان کردبووە ئامانج.
لە ڕاگەیەندراوەکەدا هاتووە، کە هێزەکانی بەرگریی ئاسمانی لەوپەڕی ئامادەباشیدا بوون و توانیویانە سەرجەم ئەو تەنە فڕێدراوانە لە ئاسماندا تێکبشکێنن، پێش ئەوەی بگەنە ئامانجەکانیان یان زیانی گیانی و ماددی لێبکەوێتەوە. وەزارەتی بەرگری جەختی لەوەش کردووەتەوە کە دەوڵەتی ئیمارات هەموو ڕێکارێکی پێویست دەگرێتەبەر بۆ پاراستنی سەروەریی خاک و ئاسمانی خۆی و بەرپەرچدانەوەی هەر دەستدرێژییەک کە ئاسایشی وڵات و هاووڵاتییان بخاتە مەترسییەوە.
ئەم پەرەسەندنە سەربازییە لە کاتێکدایە کە ناوچەی ڕۆژهەڵاتی ناوەڕاست و کەنداو شایەدی ئاڵۆزییەکی بێوێنەیە. بەرپرسانی سەربازیی ئیمارات ڕایانگەیاندووە کە هێزە چەکدارەکانیان بە وردی چاودێری هەر جووڵەیەکی گوماناوی دەکەن و ئامادەن بۆ وەڵامدانەوەی هەر جۆرە هێرشێک. تا ئێستا لایەنی ئێرانی هیچ لێدوانێکی فەرمیی لەبارەی ئەم هێرشانە و هۆکارەکانی پشت ئەم پەرەسەندنە نوێیە بڵاونەکردووەتەوە، لە کاتێکدا کۆمەڵگەی نێودەوڵەتی بە نیگەرانییەوە چاودێری دۆخەکە دەکات بۆ ڕێگریکردن لە فراوانبوونی بازنەی ململانێکان لە ناوچەکەدا.
کۆمێنت (0)
تا ئێستا هیچ کۆمێنتێک نەکراوە.