ئیدارەی واشنتن بڕیارێکی نوێی سەبارەت بە جێگیربوونی هێزەکانی لە کیشوەری ئەوروپا دەرکردووە و بەپێی زانیارییەکان، بڕیارە 5000 سەرباز لە خاکی ئەڵمانیا بکشێنێتەوە، ئەمەش وەک بەشێک لە گۆڕانکارییە ستراتیژییەکانی وەزارەتی بەرگری ئەمریکا (پنتاگۆن) لە ناوچەکەدا دێت.
تۆڕی هەواڵی CNN لە زاری چەند سەرچاوەیەکی باڵای ئاگادارەوە ئاشکرای کرد، پرۆسەی کشاندنەوەی ئەو هێزانە بە چەند قۆناغێکی جیاواز جێبەجێ دەکرێت و پێشبینی دەکرێت لە ماوەی 6 بۆ 12 مانگی داهاتوودا بە تەواوی کۆتایی پێ بێت. هەرچەندە تا ئێستا بە فەرمی ڕانەگەیەندراوە کە ئەو سەربازانە بۆ چ شوێنێکی دیکە دەگوازرێنەوە، بەڵام سەرچاوەکان ئاماژە بەوە دەکەن کە ئەگەری هەیە بەشێکیان بگەڕێنەوە بۆ ویلایەتە یەکگرتووەکان و بەشەکەی دیکەشیان لە وڵاتانی تری ناو هاوپەیمانی ناتۆ جێگیر بکرێنەوە کە لە ڕووی جوگرافییەوە لە سنوورەکانی ڕووسیاوە نزیکترن.
ئەم بڕیارە نوێیەی واشنتن لە کاتێکدایە کە ئەڵمانیا بە ناوەندی سەرەکی و ستراتیژی هێزەکانی ئەمریکا لە ئەوروپا دادەنرێت و لە دوای کۆتایی هاتنی جەنگی جیهانی دووەمەوە میوانداری گەورەترین بنکە سەربازییەکانی ئەو وڵاتە دەکات، کە ژمارەی سەربازەکانی تێیدا دەگاتە نزیکەی 35000 سەرباز.
لە ڕابردوودا، بەتایبەت لە سەردەمی ئیدارەی دۆناڵد ترەمپدا، پرسی کەمکردنەوەی هێزەکانی ئەمریکا لە ئەڵمانیا چەندین جار بووەتە هۆی دروستبوونی گرژی لە پەیوەندییەکانی نێوان واشنتن و بەرلین، بەهۆی ئەوەی ئەمریکا داوای دەکرد ئەڵمانیا خەرجییە سەربازییەکانی لە ناو ناتۆدا زیاد بکات. ئێستاش ئەم هەنگاوە هاوکاتە لەگەڵ بەردەوامی جەنگی ڕووسیا و ئۆکرانیا، کە وایکردووە ئەمریکا و هاوپەیمانەکانی چاوخشاندنەوەی ورد بە نەخشەی بڵاوەپێکردنی هێزەکانیاندا بکەنەوە بۆ ڕووبەڕووبوونەوەی هەر ئەگەرێکی نەخوازراو لە ناوچەکەدا.
کۆمێنت (0)
تا ئێستا هیچ کۆمێنتێک نەکراوە.