وەزارەتی ناوخۆ بڕیاری لێخۆشبوونی نوێی دەركرد

وەزارەتی ناوخۆی حكوومەتی هەرێمی كوردستان ئەمڕۆ سێشەممە چەند بڕیارێكی نوێی سەبارەت بە سزای بەسەرچوونی نشینگە و ڤیزای کەسانی بیانی دەركرد كە بەهۆی بارودۆخی شەڕی ئەمریكا و ئیسرائیل و ئێران مامەڵەكانیان دواكەوتووە.

وەزارەتی ناوخۆ رایگەیاند: بە مەبەستی هاوکاریکردن و کارئاسانی بۆ ئەو بیانییانەی بەهۆی بارودۆخی شەڕەوە نەیانتوانیوە گەشت بکەن یان نشینگەکانیان نوێ بکەنەوە، بڕیاری دا بە لێخۆشبوونی لە سزای دارایی بەمشێوەیەی خوارەوە:-

یەکەم/ بۆ ئەوانەی نشینگەیان بەسەرچووە و لە دەرەوەی هەرێمن:-

ئەوانەی لە دوای 28ی شوباتی 2026 نشینگەکەیان بەسەرچووە، دەتوانن تا 30ـی نیسانی 2026 بە هەمان کارت بگەڕێنەوە هەرێم و بێ سزا نشینگەکەیان نوێ بکەنەوە. دوای ئەم ڕێکەوتە پێویستیان بە ڤیزای نوێ دەبێت.

دووەم/ بۆ ئەوانەی دەیانەوێت گەشتی دەرەوە بکەن:-

ئەو بیانییانەی نشینگە یان پاسپۆرتەکەیان بەسەرچووە و نەیانتوانیوە گەشت بکەن، تا 30ـی نیسانی 2026 دەتوانن بەبێ پێدانی سزای دارایی مۆری دەرچوون وەربگرن و گەشت بکەن. هەروەها ئەو کەسانەی کە بەڵگەیان هەیە کە مامەڵەی پاسپۆرتیان بەهۆی شەڕەوە دواکەوتووە، لە سزا دەبوورێن.

سێیەم/ بۆ گەشتیاران خاوەن ڤیزا:-

ئەو گەشتیارانەی لە دوای 28ـی شوباتی 2026 ڤیزاکەیان بەسەرچووە، دەتوانن تا 30ـی نیسانی 2026 بەبێ سزا لە فڕۆکەخانە و دەروازەکانەوە بچنە دەرەوە. ئەوانەشی دەیانەوێت ڤیزاکەیان بگۆڕن بۆ نشینگە، بەبێ سزا و بەپێی ڕێنماییەکان مامەڵەیان بۆ دەکرێت.

ئەم بڕیارانە تەنها تا کۆتایی مانگی نیسانی 2026 کاری پێ دەکرێت، بۆیە پێویستە لە کاتی دیاریکراودا سەردانی بەڕێوەبەرایەتییەکانی پەیوەندیدار بکەن بۆ ڕاییکردنی مامەڵەکانتان.