گوتەبێژی بەڕێوەبەرایەتیی گشتیی حەج و عومرەی هەرێمی کوردستان ڕایگەیاند، کە ڤیزەی سەرجەم حاجییانی ئەمساڵ گەڕاوەتەوە و ئامادەکارییەکان بۆ دەستپێکردنی وەرزی حەج بەردەوامن. ئاماژەی بەوەش کرد کە بەهۆی بارودۆخی ناوچەکەوە، ئەگەر گەشتی ئاسمانی ئەستەم بێت، گەشتەکان دەکرێنە وشکانی.
کاروان ستوونی، گوتەبێژی بەڕێوەبەرایەتیی حەج و عومرە بە (کوردستان تیڤی) ڕایگەیاند، کە حکوومەتی هەرێمی کوردستان بە سەرۆکایەتیی مەسرور بارزانی، سەرۆکی حکوومەت، پاڵپشتییەکی زۆری پڕۆسەی حەجی ئەمساڵی کردووە و تاوەکو ئێستا کارەکان بە شێوەیەکی زۆر ئاسایی لە هەرێمی کوردستان، عێراق و سعوودیە بەڕێوەدەچن.
سەبارەت بە کاریگەریی گرژییەکانی ناوچەکە، گوتەبێژی حەج و عومرە ئاشکرای کرد کە بڕیارە لە 18ـی نیسانی 2026 ڤیزەی حەج چالاک بکرێت و وەرزی حەج بە فەرمی دەستپێبکات. وتیشی: "ئێستا ڤیزەی هەموو حاجییانی کوردستان گەڕاوەتەوە و لەگەڵ دەستپێکردنی وەرزەکەدا هیچ کێشەیەکیان نابێت."
لەبارەی ئەگەری گۆڕانکاری لە شێوازی گواستنەوەی حاجییان، کاروان ستوونی ڕوونیکردەوە، ئەگەر ئاڵۆزی و شەڕ لە ناوچەکەدا بەردەوام بێت، بە ئەگەرێکی زۆرەوە گەشتە ئاسمانییەکان دەگۆڕدرێن بۆ گەشتی وشکانی. جەختیشی کردەوە کە لەو بارەیەوە حکوومەتی هەرێمی کوردستان و وەزارەتی ئەوقاف و کاروباری ئایینی بڕیاری کۆتایی دەدەن بۆ پاراستنی سەلامەتیی حاجییان.
کۆمێنت (0)
تا ئێستا هیچ کۆمێنتێک نەکراوە.