وەزارەتی خوێندنی باڵا و توێژینەوەی زانستی، داوای لە وەزارەتی گواستنەوە و گەیاندن کرد، کۆمپانیاکانی گەیاندن و ئینتەرنێت ئۆفەری تایبەت بە نرخ و کوالێتییەکی گونجاو بۆ قوتابیان، خوێندکاران و مامۆستایان دابین بکەن، بە مەبەستی پاڵپشتیکردنی پرۆسەی خوێندن لە هەرێمی کوردستان.
لە راگەینراوێکدا وەزارەتی خوێندنی باڵاو توێژینەوەی زانستی: جەختی لە گرنگیی هاوکاریی کۆمپانیاکانی ئینتەرنێت کردووەتەوە بۆ سەرخستنی پرۆسەی خوێندن و ئاسانکاری بۆ مامۆستایان و قوتابیان لە بەدەستهێنانی خزمەتگوزارییەکانی ئینتەرنێت بە تێچوویەکی کەمتر. ئاماژەی بەوەش کردووە کە پێویستە ئەو ئۆفەرانەی پێشکەش دەکرێن، کوالێتییەکی بەرزیان هەبێت و هاوکارێکی سەرەکی بن بۆ پڕکردنەوەی پێداویستییە زانستی و ئەکادیمییەکان.
ئەم هەنگاوەی وەزارەتی خوێندنی باڵا لە چوارچێوەی هەوڵە بەردەوامەکاندایە بۆ پەرەپێدانی خوێندنی ئەلیکترۆنی و سوودوەرگرتن لە تەکنەلۆژیای سەردەم لە ناوەندەکانی خوێندن. بەتایبەت دوای ئەوەی لە ساڵانی ڕابردوودا سیستەمی خوێندن زیاتر بەرەو دیجیتاڵبوون چوو، دابینکردنی ئینتەرنێتی هەرزان و خێرا بووەتە یەکێک لە داخوازییە سەرەکییەکانی توێژی قوتابیان و مامۆستایان بۆ ڕاپەڕاندنی کارە زانستییەکانیان.
کۆمێنت (0)
تا ئێستا هیچ کۆمێنتێک نەکراوە.