بەهۆی ڕێگرییەکانی بازگەی مەخموور لە هاوردەکردنی بەرهەمی ناوخۆیی هەرێمی کوردستان، بازرگانان و کاسبکارانی قەزاکە وەک ناڕەزایەتییەک بەرهەم و سەوزە و میوەکانیان ڕژاندە سەر شەقام.
بەپێی زانیارییەکانی کارزان کاکڵ پەیامنێری (کوردستان تیڤی) لە شەوی ڕابردووەوە بازگەی هەولێر - مەخموور بەڕووی بازرگاناندا داخراوە و ڕێگری لە هاوردەکردنی سەوزە و میوەی هەرێمی کوردستان دەکرێت، ئەمەش بە مەبەستی ساغکردنەوەی بەرهەمی پارێزگاکانی دیکەی عێراق لە ناوچەکەدا.
کاسبکاران ئاماژە بەوە دەکەن، بازگەکان بۆ بێزارکردنی بازرگانان و دروستکردنی ئاستەنگ، داوای "بارکۆد" لەسەر بەرهەمەکان دەکەن، لە کاتێکدا هیچ جۆرە سەوزە و میوەیەک چ ئەوانەی لە عێراقەوە دێن یان ئەوانەی هەرێمی کوردستان بارکۆدیان لەسەر نییە.
ئەم بڕیارە ناڕەزایەتی توندی کاسبکارانی قەزای مەخمووری لێکەوتووەتەوە و وەک دەربڕینی تووڕەیی بەرامبەر ئەو بڕیارە، بارە سەوزە و میوەکانیان لەسەر ڕێگای گشتی فڕێدا و داوا دەکەن ئاسانکاری بۆ گواستنەوەی بەرهەمەکانیان بکرێت.
کۆمێنت (0)
تا ئێستا هیچ کۆمێنتێک نەکراوە.