شارەزایەکی کەشناسی ڕایگەیاند، لە کاتەکانی بەرەبەیانی ڕۆژی هەینی تاوەکو کاتەکانی پێش نیوەڕۆ بەفربارین زۆربەی ناوچەکان دەگرێتەوە و چاوەڕوان دەکرێت بەفربارین سەنتەری شارە گەورەکان بگرێتەوە.
ڕۆژی پێنجشەممە، 22ـی کانوونی دووەم، هەڤاڵ صدیق گەڵۆزی، شارەزای کەشناسی ڕایگەیاند: بەپێی نوێترین وێنە و دیمەنەکانی مانگە دەستکردەکان، پێشبینی دەکرێت لە درەنگانی ئەمشەوەوە هەرێمی کوردستان بکەوێتە ژێر کاریگەریی شەپۆلێکی چڕی بەفرباران و بارانبارین، ئەمەش بەهۆی هاتنی بارستە هەوایەکی ساردی جەمسەری کە ناوچەکانی تورکیا و وڵاتانی شام و باکوور و ڕۆژئاوای کوردستانی گرتووەتەوە.
لە ڕاگەیەندراوەکەدا هاتووە: سەرەتای کاریگەریی ئەم شەپۆلە لە درەنگانی ئەمشەوەوە لە سنووری ئیدارەی سەربەخۆی زاخۆ، پارێزگای دهۆک و شاری موسڵەوە دەستپێدەکات. پاشان لە کاتژمێر 12ـی شەوی پێنجشەممە لەسەر هەینی، کاریگەریی شەپۆلەکە فراوانتر دەبێت و تەواوی ناوچە جیاوازەکانی هەرێمی کوردستان دەگرێتەوە.
بەپێی پێشبینییەکان، لە کاتەکانی بەرەبەیانی ڕۆژی هەینی تاوەکو کاتەکانی پێش نیوەڕۆ، بەفر بارین زۆربەی ناوچەکان دەگرێتەوە و چاوەڕوان دەکرێت بەفر لەم شوێنانە ببارێت، (هەولێر، دهۆک، سلێمانی، کەرکوک و هەڵەبجە) هەروەها سۆران، ڕاپەرین و کۆیە لەگەڵ دەشتاییەکانی هەولێر و بەشێک لە ناوچەکانی باکووری گەرمیان و هەندێک لە ناوچەکانی باشووری کەرکوک بگرێتەوە.
ئەم شەپۆلە نزمبوونەوە بەرچاوەی پلەی گەرما و بارانبارینی چڕی لەگەڵ دەبێت، کەشناسەکە جەخت لەوە دەکاتەوە کە کاریگەریی بارستە هەوا ساردەکە تاوەکو ڕۆژی هەینی بەردەوامی دەبێت.
کۆمێنت (0)
تا ئێستا هیچ کۆمێنتێک نەکراوە.