پێشبینی دەكرێت ئەمشەو تا بەرەبەبیان لە سەنتەری بەشێك لە شارەكانی هەرێمی كوردستان بەفر ببارێت و پلەكانی گەرماش بۆ ژێر پلەی سفڕی سیلیزی نزم ببێتەوە.
ئاراس جەبار شارەزای كەشناسی دەڵێت "پێشبینی دەكرێت لە چەند کاتژمێری داهاتوودا شەپۆلێکی سەرما و شەختە سەرجەم ناوچەکانی هەرێمی کوردستان و عێراق بگرێتەوە و نزمترین پلەکانی گەرمای بۆ ئەم مانگە تێدا تۆمار دەکرێت".
دەشڵێت "پێشبینی دەكرێت ئەمشەو تا بەرەبەیان بەفر لە سەنتەری شارەكانی سلێمانی، هەڵەبجە، سۆران، ڕانیە، قەڵادزێ، کۆیە، شەقڵاوە، دووکان، چەمچەماڵ، بازیان، دەربەندیخان و ناوچەکانی باکوری گەرمیان ببارێت".
هەروەها دەڵێت "پێشبینی كراوە لەو ناوچانەی سەرەوە لەنێوان 2 تا 6 سم بەفر ببارێت و نزمترین پلەكانی گەرماش بۆ ژێر سفڕی سیلیزی نزم ببێتەوە".
ئەو شارەزایەی كەشناسی گوتیشی "کاریگەری ئەو شەپۆڵەی بەفر و سەرمایە تا سەرەتای هەفتەی داهاتوو بەردەوامی دەبێت بەتایبەت لە ناوچە شاخاوییەکاندا كە بە درێژایی رۆژانی داهاتوو شەختە و بەستن دەبێت".
کۆمێنت (0)
تا ئێستا هیچ کۆمێنتێک نەکراوە.