بەڕێوەبەرایەتیی گشتیی حەج و عومرەی هەرێمی کوردستان گیانلەدەستدانی عومرەکارێکی دیکەی کوردستانی لە شاری مەککە ڕاگەیاند، عومرەکارەکە بەهۆی نەخۆشییەوە ماوەی 10 ڕۆژە لە نەخۆشخانە ماوەتەوە و ئەمڕۆ گیانی لەدەست داوە.
کاروان ستوونی، وتەبێژی بەڕێوەبەرایەتیی گشتیی حەج و عومرەی هەرێمی کوردستان ڕایگەیاند، ئەمڕۆ عومرەکارێکی خەڵکی هەرێمی کوردستان بە ناوی (ڕۆناک ئیبراهیم ئەحمەد) کە تەمەنی 67 ساڵە، لە شاری مەککە کۆچی دوایی کرد.
وتەبێژی حەج و عومرە ڕوونی کردەوە، ئەو عومرەکارە بە ڕێگەی ئۆتۆمبێلی خۆیان گەشتیان کردبوو، بەڵام بەهۆی تێکچوونی دۆخی تەندروستییەوە ماوەی 10 ڕۆژە لە نەخۆشخانەی مەلیک فەیسەڵ لە مەککە ماوەتەوە و ئەمڕۆ گیانی لەدەست داوە.
کاروان ستوونی ئاماژەی بەوەش دا، بە گیانلەدەستدانی ئەو هاووڵاتییە، ژمارەی ئەو عومرەکارانەی هەرێمی کوردستان کە لە سەرەتای ساڵی 2026ـەوە لە سعوودیە کۆچی دواییان کردووە، گەیشتە 3 کەس.
سەبارەت بە ڕێکارەکان، ناوبراو ئاشکرای کرد کە ڕێکارە یاسایی و کارگێڕییەکان تەواو کراون و بڕیارە هەر ئەمڕۆ لە شاری مەککە بە خاک بسپێردرێت، هاوکات ئامادەیی بەڕێوەبەرایەتییەکەیانی بۆ هەر ئاسانکارییەک بۆ خانەوادەکەی دووپات کردەوە.
کۆمێنت (0)
تا ئێستا هیچ کۆمێنتێک نەکراوە.