مارک ساڤایا، نێردەی تایبەتی سەرۆکی ئەمریکا بۆ کاروباری عێراق، ڕایگەیاند بە مەبەستی تاوتوێکردنی چاکسازی لە سیستەمی بانکیی عێراق و بەرەنگاربوونەوەی گەندەڵی دارایی، زنجیرەیەک کۆبوونەوەی گرنگی لەگەڵ وەزارەتی خەزێنەی ئەمریکا و نووسینگەی کۆنتڕۆڵکردنی سەرمایە بیانییەکان (OFAC) ئەنجام داوە.
ساڤایا لە ڕاگەیەندراوێکدا کە لە هەژماری خۆی لە تۆڕی کۆمەڵایەتیی ئێکس بڵاوی کردووەتەوە، ئاماژەی بەوە کرد کۆبوونەوەکان سەرنجیان خستووەتە سەر دۆزینەوەی هەلەکانی چاکسازی لە هەردوو کەرتی بانکیی حکومی و تایبەت لە عێراقدا. جەختیشی کردەوە کە واشنتن کاردەکات بۆ بەهێزکردنی حوکمڕانی دارایی، پابەندبوون بە ڕێسا نێودەوڵەتییەکان و چەسپاندنی لێپرسینەوەی دامەزراوەیی.
نێردەی تایبەتی سەرۆکی ئەمریکا ئاشکرای کرد کە لەگەڵ لایەنە پەیوەندیدارەکانی ئەمریکا ڕێک کەوتوون لەسەر ئەنجامدانی "وردبینییەکی گشتگیر" بۆ سەرجەم ئەو تۆمار و مامەڵە داراییە گوماناوییانەی پەیوەندییان بە دامەزراوە، کۆمپانیا و کەسایەتییەکانی عیراقەوە هەیە.
ئەم هەنگاوە ئەو لایەنانە دەگرێتەوە کە تێوەگلاون لە:
- قاچاخچێتی و سپیکردنەوەی پارە
- گرێبەست و پڕۆژە داراییە ساختەکان
- دابینکردنی دارایی بۆ چالاکییە تیرۆریستییەکان
لە بەشێکی دیکەی ڕاگەیاندراوەکەیدا، ساڤایا ئاماژەی بە نزیکبوونەوەی سزای نوێ کرد و وتی: " هەنگاوەکانی داهاتوومان تاوتوێ کردووە سەبارەت بە سەپاندنی سزا بەسەر ئەو ئەکتەر و تۆڕە تێکدەرانەی کە زیان بە دەسپاکی دارایی و دەسەڵاتی دەوڵەت دەگەیەنن."
لە کۆتاییدا، مارک ساڤایا جەختی لە پتەویی پەیوەندییەکانی نێوان بەغدا و واشنتن کردەوە و ڕایگەیاند: "پەیوەندییەکانی نێوان عێراق و ویلایەتە یەکگرتووەکانی ئەمریکا، لە ژێر سەرکردایەتی سەرۆک دۆناڵد ترەمپدا، لە هیچ کاتێکدا بە ئەندازەی ئەمڕۆ بەهێز نەبووە."
Today, I met with the U.S. Department of the Treasury and OFAC to address key challenges and reform opportunities across both state owned and private banks, with a clear emphasis on strengthening financial governance, compliance, and institutional accountability.
— Mark Savaya (@Mark_Savaya) January 15, 2026
We agreed to… pic.twitter.com/CU8Z4ZmYEV
کۆمێنت (0)
تا ئێستا هیچ کۆمێنتێک نەکراوە.