سەرۆك بارزانی پەیامێك لەبارەی كشانەوەی د. شاخەوان عەبدوڵا لە پڕۆسەی خۆپاڵاوتن بۆ پۆستی جێگری سەرۆکی ئەنجوومەنی نوێنەرانی عێراق بڵاو دەكاتەوە.
سەرۆك بارزانی لە پەیامەكەدا رایدەگەیەنێت "بەرژەوەندیی گەلی کوردستان و پارتی وای دەخواست کە دکتۆر شاخەوان لە پڕۆسەكەدا بکشێتەوە".
سەرۆك بارزانی هەروەها رایدەگەیەنێت "د. شاخەوان كوڕی پارتییە و ڕۆڵەیەكی ئازا و جێی متمانەی ئێمەیە، لە هەر شوێنێك و پلەیەكدا بێت كاری خۆی بە باشترین شێوە جێبەجێ دەكات".
دەقی پەیامەكەی سەرۆك بارزانی:-
بەناوی خودای مەزن و دلۆڤان
پێزانینێكی زۆرم بۆ د. شاخەوان عەبدوڵڵا هەیە لە ماوەی ڕابردوو لە كاری پەرلەمانی و حزبیی خۆیدا ڕۆڵێكی كارا و ماندووبوونێكی زۆری بینیوە. دەستخۆشیی لێ دەكەم كە ئەرك و كارەكانی بە ڕۆحێكی نیشتیمانپەروەرانە ئەنجام داوە، هەمیشە بە باشی پابەندی ڕێكارەكان و دیسپلینی حزبی بووە و جێگەی متمانە بووە.
بەرژەوەندیی گەلی کوردستان و پارتی وای دەخواست کە دکتۆر شاخەوان لە پڕۆسەی خۆپاڵاوتن بۆ پۆستی جێگری سەرۆکی ئەنجوومەنی نوێنەرانی عێراق خۆی بکشێنێتەوە. لەگەڵ ئەوەش لەوە دڵنیام د. شاخەوان ڕۆڵەیەكی ئازا و شایستەی ئەو میلـلەتەیە، لە هەر شوێنێك و هەر پلەیەكدا بێت، كوڕی پارتییە و ئەرك و كاری خۆی بە باشترین شێوە جێبەجێ دەكات و جێی متمانەی ئێمەیە.
مسعود بارزانی
30ی كانوونی یەكەمی 2025
کۆمێنت (0)
تا ئێستا هیچ کۆمێنتێک نەکراوە.