شانشینی سعوودیە لە بەیاننامەیەکی تونددا و وەک پەرەسەندنێکی نوێی مەترسیدار، داوای لە ئیمارات کرد کە لە ماوەی 24 کاتژمێردا سەرجەم هێزەکانی لە خاکی یەمەن بکشێنێتەوە. ئەم داواکارییە دوای ئەوە دێت کە ڕیاز بە فەرمی نیگەرانیی خۆی بەرامبەر بە ڕۆڵی ئیمارات لە باشووری یەمەن دەربڕی.
لە بەیاننامەکەدا، سعوودیە داخی خۆی بەرامبەر بە بەردەوامیی پشتیوانییەکانی ئیمارات بۆ هێزەکانی "ئەنجومەنی ڕاگوزەری باشوور" نیشان داوە. دەسەڵاتدارانی سعوودیە ئەو هەنگاوانەی ئیماراتیان بە "زۆر مەترسیدار" و هەڕەشەی راستەوخۆ بۆ سەر ئاسایشی نیشتمانیی وڵاتەکەیان وەسف کردووە. لەو چوارچێوەیەدا، ڕیاز بە ڕوونی داوای لە ئەبووزەبی کردووە دەستبەجێ هەموو جۆرە پشتیوانییەکی سەربازی یان دارایی بۆ ئەنجومەنی ڕاگوزەری باشوور و هەر لایەنێکی دیکە لە یەمەن ڕابگرێت.
پێش دەرکردنی ئەم بەیاننامەیە، گرژییەکان لەسەر زەوی گەیشتبوونە ئاستێکی بەرز؛ بە جۆرێک کە فڕۆکە جەنگییەکانی سعوودیە بەندەری "موکەلا"یان لە باشووری یەمەن کردبووە ئامانج. سەبارەت بە هۆکاری ئەو هێرشە، سعوودیە ڕایگەیاندووە ئیمارات ئەو بەندەرەی بۆ ناردنی چەک و تەقەمەنی بۆ هێزە "جوداییخوازەکان" بەکار هێناوە، هەنگاوێک کە بە لای ڕیازەوە قبووڵنەکراوە.
ئەم پەرەسەندنە سەربازی و سیاسییە هاوکاتە لەگەڵ هەڵوێستی ئەنجومەنی سەرۆکایەتیی یەمەن، کە لە بەیاننامەیەکدا ئاشکرای کردووە ئەو جوداییخوازانەی ئیمارات پشتیوانییان دەکات، لە باشووری یەمەن دەستیان بەسەر چەندین ناوچەدا گرتووە. هەریەک لە سعوودیە و ئەنجومەنی سەرۆکایەتیی یەمەن، هێزەکانی ئەنجومەنی ڕاگوزەری باشوور بە هێزی "جوداییخواز" ناو دەبەن و جموجۆڵەکانیان بە مەترسی دەزانن.
تا کاتی ئامادەکردنی ئەم هەواڵە، ئیمارات هیچ کاردانەوەیەکی فەرمیی نیشان نەداوە و بێدەنگیی هەڵبژاردووە.
کۆمێنت (0)
تا ئێستا هیچ کۆمێنتێک نەکراوە.