قایمقامی چۆمان داوا لە شوفێران و هاووڵاتییان دەكات بۆ گەشتی بەفر و بەسەربردنی كات روو نەكەنە شارۆچكەی چۆمان و حاجی ئۆمەران و ژیانی خۆیان نەخەنە مەترسییەوە.
ئەحمەد بارزان قایمقامی چۆمان رایگەیاند: هۆشداریی بە سەرجەم هاووڵاتییان دەدەین کە بە هیچ شێوەیەک بە مەبەستی کاتبەسەربردن ڕوونەکەنە سنووری شارۆچكەی چۆمان و حاجی ئۆمەران.
راشیگەیاند: ئێستا بە هۆکاری چڕی بەفربارین و مەترسی بەستەڵەکبوونی رێگەکان، تیمەکانی پاککردنەوەی رێگەکان ناتوانن جگە لە رێگە سەرەکییەکان، رێگە لاوەکییەکان پاک بکەنەوە.
ئەحمەد بارزان هەروەها رایگەیاند: هۆشداریی بە خەڵک دەدەین كە ژیانی خۆیان نەخەنە مەترسییەوە، بەهۆکاری کەمی تیمەکانی بەهاناوەچوون، نەچنە ئەو شوێنانەی کە ناتوانین بە ئاسانی فریایان بکەوین.
ئەمە لەكاتێكدایە كە ماوەی چەند رۆژێكە و بەتایبەتیش ئەمڕۆ دووشەممە شەپۆڵێكی بەفربارینی چڕ شارۆچكەی چۆمان و حاجی ئۆمەران و ناوچەكانی دیكەی گرتۆتەوە و بەهۆیەوە ئاستەنگ بۆ هاتوچۆی شوفێران دروستكردووە و تەنانەت كە بەشێك لە رێگەكان بەتەواوی داخراون.
کۆمێنت (0)
تا ئێستا هیچ کۆمێنتێک نەکراوە.