دادگای باڵای تاوانەكانی عێراق ئەمڕۆ یەكشەممە بڕیاری لەسێدارەدانی بۆ یەكێك لە تۆمەتبارەكانی جینۆساید و كۆمەڵكوژی بارزانییەكان دەركرد.
ئەمڕۆ یەكشەممە دادگای باڵای تاوانەکانی عێراق لە شاری بەغدا دانیشتنێکی تایبەتی بۆ دادگاییکردنی دوو تۆمەتبار بە پلەی لیوا بە ناوەکانی (شاکر تەها یەحیا غەفوور ئەلدووری) و (سەعدوون سەبری جەمیل ئەلقەیسی) ئەنجام دا کە تۆمەتبارن بە بەشداری لە کەیسی جینۆساید و کۆمەڵکوژی بارزانییەکاندا.
لە دانیشتنەکەدا کەریم کاوە کەریم بەڕێوەبەری گشتی کاروباری شەهیدان و ئەنفالکراوانی سۆران و شاندێکی وەزارەتی کاروباری شەهیدان و ئەنفالکراوانی حکوومەتی هەرێمی کوردستان، بە یاوەری پارێزەر ئەیاد کاکەیی و 7 کەس لە کەسوکاری جینۆسایدکراوانی سنووری ئیدارەی سۆران ئامادە بوون.
دوای تاوتوێکردنی بەڵگەکان و وەرگرتنی گوتەی شایەتحاڵەکان، دادگای باڵای تاوانەکانی عێراق بڕیاری لە سێدارەدانی بۆ تۆمەتبار (شاکر تەها یەحیا ئەلدووری) دەرکرد، ئەمەش بەهۆی سەلماندنی تاوانباربوونی لە بەشداری ڕاستەوخۆ لە پڕۆسەی جینۆساید و کۆمەڵکوژی بارزانییەکاندا.
ئەم بڕیارە وەک هەنگاوێکی گرنگی دادپەروەری بۆ کەسوکاری قوربانیانی جینۆسایدی بارزانییەکان هەژمار دەکرێت، کە ساڵانێکی درێژە چاوەڕوانی سزادانی ئەنجامدەرانی ئەو تاوانە گەورەیە دەکەن.
وێنە: دەقی بڕیاری دادگای باڵای تاوانەكانی عێراق سەبارەت بە لە سێدارەدانی تاوانبار:-
کۆمێنت (0)
تا ئێستا هیچ کۆمێنتێک نەکراوە.