بەهۆی ئەو شەپۆلە بارانبارینەی ڕووی لە ناوچەکە کردووە، بەشێکی شاخی هەیبەتسوڵتان هەرەسی هێنا و بەهۆیەوە ڕێگەی سەرەکیی نێوان کۆیە و ئیدارەی ڕاپەڕین داخرا.
بەهۆی دابارینی ڕێژەیەکی زۆری باران، زیاتر لە 50 مەتر لە شاخی هەیبەتسوڵتان هەرەسی هێناوە و بەو هۆیەوە ڕێگەی نێوان قەزای کۆیە و ئیدارەی ڕاپەڕین داخراوە.
لەم بارەیەوە شالاو مودیر، ئەندامی تیمەکانی کردنەوەی ڕێگەکە بە کوردستان تیڤی ڕاگەیاند: لە ئێستادا تیمەکانی قایمقامیەت، بەڕێوەبەرایەتییەکانی کارەبا، ئاوەدانکردنەوە و هاتوچۆی کۆیە لە شوێنی ڕووداوەکەن و 5 تیم سەرقاڵی کارکردنن بۆ کردنەوەی ڕێگەکە.
ناوبراو ئاشکرای کرد کە بەهۆی هەرەسەکەوە 5 ستوونی کارەبا کەوتوون و مەترسیی داڕمانی دیکەش هەیە، بۆیە داوا لە شۆفێران دەکەن ئەم ڕێگەیە بەکار نەهێنن تاوەکوو پاک دەکرێتەوە و مەترسییەکە نامێنێت.
بەپێی ئاماری بەشی کەشناسیی کۆیە، لە ماوەی 24 کاتژمێری ڕابردوودا 65 ملیمەتر باران لە سنوورەکە باریوە.
کۆمێنت (0)
تا ئێستا هیچ کۆمێنتێک نەکراوە.