گەنجێكی وڵاتی گانا بەم دواییە لە تۆڕەكانی كۆمەڵایەتی هەوادارێكی زۆری لە سەرتاسەری جیهان لەخۆی كۆكردۆتەوە، گەنجەكە دەڵێت "لەلایەن خوداوە پەیامم بۆ هاتووە كە بەمزووانە تۆفان و لافاو روو دەدات و بەهۆیەوە خەڵكێكی زۆر لە جیهان لەناو دەچن".
گەنجەكە ناوی ئیبۆ جیسوسە و ناوی لەخۆی ناوە (ئیبۆ نووح) و تەمەنی 30 ساڵە.
ئیبۆ دەڵێت "لەلایەن خوداوە پەیامم بۆ هاتووە كە بۆ ماوەی 3 ساڵ لەسەر یەك باران دەبارێت و بارانبارینەكەش لە 25/12/2025 دەست پێ دەكات".
ئیبۆ هەروەها دەڵێت "خودای گەورە داوای لێ كردووم كاری پێغەمبەر نووح لە دروستكردنی كەشتی گەورە دووبارە بكەمەوە بۆ ئەوەی خەڵك و ئاژەڵ و باڵداران لە تۆفان و لافاو رزگار بكەم".
ئەو گەنجەی گانا پەیامەكانی لە تۆڕی كۆمەڵایەتی (تیكتۆك، ئینستگرام و یوتووب) بڵاو دەكاتەوە و بەهۆیەوە هەزاران هەواداری لە سەتاسەری جیهان بۆ خۆی پەیدا كردووە.
لە بەشێك لە ڤیدیۆكان دەردەكەوێت كە ئیبۆ و دەیان هاوەڵی خەریكی كۆكردنەوەی دار و دروستكردنی كەشتی گەورەن، ئاماژە بەوە دەكات كە بەهۆی ئەم كەشتییانەوە دەتوانێت 600 ملیۆن كەس لە جیهان رزگار بكات.
هەرچەندە پەیام و ڤیدیۆكانی ئیبۆ نووح جێگەی گومان و پرسیارن، بەڵام بە هەزاران كەس بڕوایان پێی كردووە و تەنانەت خانوو و ماڵ و سەروەت و سامانیان فرۆشتووە و بۆیان ناردووە تا لە كاتی دروستبوونی تۆفان و لافاوەكەدا رزگاریان بكات.
هەرچەندە ئیبۆ نووح چەند جارێك لەلایەن دەسەڵاتدارانی گانا بە تۆمەتی بڵاوكردنەوەی هەواڵ و دەنگۆی ناڕاست و چەواشەكاری دەستگیر كراوە، بەڵام دوای ماوەی چەند كاتژمێرێك لە دەستگیركردن ئازاد كراوە.
کۆمێنت (0)
تا ئێستا هیچ کۆمێنتێک نەکراوە.