وردەکاریی زیانەکانی بارانبارین و لافاو لە کوردستان ڕاگەیاندرا

ناوەندی هاوبەشی هەماهەنگیی قەیرانەکان (JCC) دواین ئاماری فەرمیی زیانەکانی شەپۆلی بەهێزی بارانبارینی ڕۆژانی 8 و 9ی کانوونی یەکەمی 2025ـی بڵاو کردەوە. بەگوێرەی ئامارەکە، لە سنووری سلێمانی و گەرمیان و کەرکووک زیانی گیانی و ماددی زۆر کەوتووەتەوە و پردی ستراتیژی و ڕێگەی سەرەکی داڕماون.

سلێمانی و چەمچەماڵ؛ زۆرترین زیانیان بەرکەوتووە

بەگوێرەی ڕاپۆرتەکە، ڕۆژی سێشەممە (9/12/2025) بارانێکی بەلێزمە پارێزگای سلێمانیی گرتووەتەوە و بڕی دابارین گەیشتووەتە (122.7) ملم، ئەمەش بووەتە هۆی ژێرئاوکەوتنی چەندین ماڵ و قوتابخانە لە گەڕەکی ڕاپەڕین.

دۆخەکە لە قەزای چەمچەماڵ و ناحیەکانی تەکیە و شۆڕش سەختتر بووە، بەجۆرێک لە تەکیە (173.5) ملم باران باریوە. زیانەکان بەم شێوەیەن:

•              2 کەس گیانیان لەدەست داوە و 12 کەس بریندارن، کەسێکیش بێسەروشوێنە.

•              500 ماڵ لە چەمچەماڵ و ژمارەیەک ماڵ لە بازیان و سلێمانی زیانیان بەرکەوتووە.

•              دەیان ئۆتۆمبێل، 100 دووکان و کۆگا، 5 فەرمانگەی حکومی و کتێبخانەی گشتیی چەمچەماڵ و نەخۆشخانەی شەهید غەریب هەڵەدنی ئاویان تێ چووە.

•              ڕێگە سەرەکییەکانی (سلێمانی- چەمچەماڵ) و (کەرکووک – چەمچەماڵ) داخراون.

•              تۆڕەکانی کارەبا و ئینتەرنێت پچڕاون.

گەرمیان؛ لافاو ڕێگەکان و پڕۆژە ئاوییەکانی وێران کردووە

لە ئیدارەی گەرمیان، بارانبارینی دوای نیوەڕۆی سێشەممە (76.6) ملم بووەتە هۆی لافاوێکی گەورە لە کەلار و ڕزگاری:

•              ڕێگەی سەرەکیی نێوان کەلار-ڕزگاری و ڕێگەکانی دەرەوەی گەرمیان داخراون.

•              بەشێکی پڕۆژەی ئاودێری سەلام (شادەماری ژیانی گەرمیان) لە هەوارە سوورە بەتەواوی ئاو بردوویەتی.

•              پردی نێوان کفری و ڕزگاری لە ناحیەی سەرقەڵا ڕووخاوە.

•              زیان بە پڕۆژەکانی ماسی، خانووی پلاستیکی، مەڕوماڵات و سندووقی هەنگ کەوتووە.

کەرکووک؛ پردی داقووق داڕما و هاتوچۆی بەغدا پچڕا

لە پارێزگای کەرکووک زیانەکان کاریگەرن:

•              پردێکی ستراتیژی لە قەزای داقووق داڕماوە، بەمەش هاتوچۆی نێوان کەرکووک و بەغدا پچڕاوە.

•              منداڵێکی تەمەن ٧ ساڵ لە گوندی فرقانی خنکاوە.

•              لە گوندی بەیانلوو پردێک ئاو بردوویەتی و ڕێگەی کەرکووک-لەیلان داخراوە.

هەولێر؛ برینداربوونی پێشمەرگە و ڕاگرتنی پڕۆژەکانی ئاو

لە هەولێر زیانەکان کەمتر بوون، بەڵام کاریگەرییان هەبووە:

•              بەهۆی هەورەبرووسکەوە ٦ پێشمەرگە لە سنووری بالیسان بریندار بوون.

•              لە گوندی قەریتاغ ئاو چووەتە ناو ٦ ماڵەوە.

•              بەهۆی لێڵبوونی ئاوەوە، پڕۆژەکانی ئاو لەسەر زێی گەورە بۆ ماوەی 24 بۆ 48 کاتژمێر ڕاگیراون و داوا لە هاووڵاتییان کراوە دەست بە ئاوەوە بگرن.

هەڵەبجە، ڕاپەڕین، سۆران و دهۆک

•              هەڵەبجە: بڕی 92.5 ملم باران باریوە، پشووی فەرمی ڕاگەیەندراوە و ئاستی ئاوی سیروان بەرزبووەتەوە.

•              ڕاپەڕین: ئاستی ئاوی زێی بچووک بەرزبووەتەوە و 3 ماڵ لە حاجی ئاوا زیانیان بەرکەوتووە. دەروازەی کێلی بەهۆی بەفرەوە داخراوە.

•              سۆران: بەفرێکی زۆر لە ناوچە شاخاوییەکان باریوە، لە سیدەکان و چۆمان بەهۆی داڕمانی زەوی و بەردەوە زیان بە چەند خانویەک گەیشتووە.

•              دهۆک و زاخۆ: بارانبارین مامناوەند بووە، تەنها لە زاخۆ ئاستی ئاوی خابوور بەرزبووەتەوە و لە گوندی کانی رەهال ڕێگەیەک ڕۆچووە.

ناوەندی JCC دووپاتی کردووەتەوە کە تیمەکانی فریاگوزاری، لە سەرجەم ناوچەکان، بۆ بەهاناوەچوونی هاووڵاتییان، لە ئامادەباشیدان.