حكوومەتی هەرێمی كوردستان لە روونكردنەوەیەكدا لەبارەی سەردانە مێژوویەكەی سەرۆك بارزانی بۆ جزیرێ رایگەیاند "ئەو پیشوازییە گەرمەی لە سەرۆك بارزانی كرا جێگەی سوپاس و پێزانینە".
لە روونكردنەوەكەدا ئاماژە بەوەشدراوە "هەرچەندە سەردانەكە لێكدانەوە و خوێندنەوەی جیاوازی بۆ كرا، بەڵام ئەوەی گرنگە ئەوەیە كە سەردەمێکی ناوازە لە پەیوەندییەکانی نێوان تورکیا و هەرێمی کوردستان هەیە".
حكوومەتی هەرێمی كوردستان هەروەها بە پێویستی زانی كە هەمووان بەیەكەوە هەوڵی ڕەواندنەوەی نیگەرانییەكان بدەن و لە بەرامبەردا جەخت لە ئاشتەوایی و سەقامگیری ناوچەكە بكەنەوە.
دەقی روونكردنەوەكەی حكوومەتی هەرێمی كوردستان لەبارەی سەردانەكەی سەرۆك بارزانی بۆ جزیرێ:-
سەردانی مێژوویی سەرۆک بارزانی بۆ پارێزگەی شڕناخ و دەڤەری جزیرێ و بەشداریکردنی لە سیمپوزیومی مەلایێ جزیری و دەربڕینی پشتیوانی خۆیان بۆ پرۆسەی ئاشتی و ئەو پێشوازییە گەرمەی کە لەلایەن دامودەزگا فەرمییەکانی حکوومەت و خەڵکی ناوچەکە لە بەڕێزیان کرا، جێگەی سوپاس و پێزانینە.
بەڵام دواتر لێکدانەوە و خوێندنەوەی جیاواز و نەخوازراو و دوور لە مەبەست هاتنە ئاراوە، کە دڵگرانیی لێکەوتەوە.
ئەوەی کە گرنگە ئەوەیە کە سەردەمێکی ناوازە لە پەیوەندییەکانی نێوان کۆماری تورکیا و هەرێمی کوردستان لە ئارادایە.
پرۆسەی ئاشتیش هەنگاوێکی دروستە لە چارەسەرکردنی پرسێکی گرنگ و هەستیار و دەستخۆشی لە حکوومەت و حزبە دەسەڵاتدارەکانی تورکیا و هەموو لایەک دەکەین کە ڕۆڵی کاریگەریان هەبووە لە بەرەوپێشبردنی ئاشتی و سەقامگیری لە تورکیا و ناوچەکەدا.
بە پێویستی دەزانین هەموو لایەکمان بە هاوکاریی یەکتر هەوڵی ڕەواندنەوەی نیگەرانییەکان بدەین و جەخت لە قووڵترکردنی پەیوەندییەکان و بەدیهێنانی ئاشتەوایی و پاراستنی بەرژەوەندییە هاوبەشەکانمان و سەقامگیری ناوچەکە بکەین.
حکوومەتی هەرێمی کوردستان
2025/12/4
کۆمێنت (0)
تا ئێستا هیچ کۆمێنتێک نەکراوە.