مەكتەبی سیاسی پارتی دیموكراتی كوردستان لەبارەی دەنگۆی هەوڵەكان بۆ دەستوەردان و گۆڕینی ئەنجامەكانی هەڵبژاردن لەلایەن چەند لایەنێكەوە راگەیەنراوێك بڵاو دەكاتەوە، جەخت دەكاتەوە كە ئەمە هێڵی سوورە.
لە راگەیەنراوەكەی مەكتەبی سیاسی پارتیدا هاتووە "لە ئەگەری دەستوەردان و گۆڕانكاری لە ئەنجامە ڕاگەیاندراوەکان لەلایەن كۆمسیۆنی هەڵبژاردنەکان، هەڵوێستی سیاسی جدیمان دەبێت.
دەقی ڕاگەیانراوەكەی مەكتەبی سیاسیی پارتی دیموكراتی كوردستان:-
هاووڵاتیانی بەڕێز...
هەروەكو ئاگادارن پرۆسەی هەڵبژاردنی خولی شەشەمی ئەنجوومەنی نوێنەرانی عێراقی فیدراڵ لە ڕێكەوتی (11ـی 11ـی 2025) لە كەشوهەوایەكی دیموكراسیانە و ئازادانە و بە ڕێكوپێكی و شەفافانە ئەنجامدرا، لیست و قەوارە سیاسییەكان و کاندیدی كۆتاكان بەگوێرەی یاسا بەركارەكان و ڕێنماییەكان بەشدارییان كرد. كۆمسیۆنی باڵای سەربەخۆی هەڵبژاردنەکان دوای ئەنجامدانی ڕێكارە یاساییەكان، ئەنجامی كۆتایی بەشێوەیەكی فەرمی ڕاگەیاند.
ئێستاش لێرە و لەوێ گوێبیست دەبین كە هەواڵێك هەیە بۆ دەستوەردان لە ئاكامی هەڵبژارد، بەتایبەتی كۆتاكان و گۆڕینی ئاكام و ئەنجامەکان! ئێمە لە مەكتەبی سیاسی پارتی دیموكراتی كوردستان ڕایدەگەیەنین، کە بەهیچ شێوەیەك دەستوەردان و گۆڕینی ئاكامەكانی هەڵبژاردن بە گشتی و كۆتاكان بەتایبەتی قبوڵكراو نییە و، بە هێڵی سووری دادەنێین. لە ئەگەری دەستوەردان و گۆڕانكاری لە ئەنجامە ڕاگەیاندراوەکان لەلایەن كۆمسیۆنی هەڵبژاردنەکان هەڵوێستی سیاسی جدیمان دەبێت.
مەكتەبی سیاسی
پارتی دیموكراتی كوردستان
18ـی 11ـی 2025
کۆمێنت (0)
تا ئێستا هیچ کۆمێنتێک نەکراوە.