گوتەبێژی فەرمی حەج و عومڕەی کوردستان لە لێدوانێکی رۆژنامەوانیدا رایگەیاند، پاش کۆتاییهاتنی پرۆسەی ناونووسینی حاجیان، ئێستا دەستیان کردووە بە وردبینیکردن لە داواکارییەکان و تاوەکو ئێستا 6556 کەس نامەیان بۆ چووە و ئاگادار کراونەتەوە کە پێویستە زانیارییەکانیان راست بکەنەوە، بەداخەوە تاوەکو ئێستا وەکو پێویست خەڵک نامەکانیان نەکردووتەوە و زانیارییەکانیان ڕاست نەکردووتەوە.
کاروان ستوونی هەروەها گوتی: داواکارین لەو کەسانەی نامەیان پێگەیشتووە بەرێگەی نامەی مۆبایل یان وەتسئاپ یان ڤایبەر بە زووترین کات زانیارییەکانیان دروست بکەن و کەموکوڕی فۆرمەکانیان راست بکەنەوە، چونکە ئەگەر بەمشێوەیە بمێننەوە ئەوا مافی بەشداریکردن لە تیروپشکی ناوی حاجیانیان نابێت.
سەبارەت بە کاتی بەرێوەچوونی تیروپشکی حاجیان، کاروان ستوونی گوتەبێژی فەرمی حەج و عومڕەی کوردستان ئەوەیشی خستەڕوو: ئێستا خەریکی پرۆسەی وردبینکردنی ناوی حاجیان و لە کۆی 59389 فۆرم 46507 فۆرم بە تەواوی وردبیینیان بۆ کراوه و ئامادەن بۆ تیروپشک و گوتیشی لە چەند رۆژی داهاتوودا پرۆسەی وردبینیکردنی فۆرمەکان بە کۆتایی دێت و دواتریش قوناغی بەراورد کاری ناوی حاجیان دەستپێدەکات.
راشیگهیاند: هەر کەسێک پێشووتر وەکو هاووڵاتيی حەجی کرد بێت ئەوا مافی نابێت جارێکی دیکە حەج بکات و دەرفەتەکە بۆ هاووڵاتییانی دیکە دەبێت کە تاوەکو ئێستا حەجیان نەکردووە ئەمەیش لەسەر بنەمای یەکسانی و پەیرەوکردنی دادپەروەری لەنێوان هەموو هاووڵاتییانی کوردستان بەبێ جیاوازی.
گوتەبێژی فەرمی حەج و عومڕەی کوردستان ئاشكراشى كرد: بە ئەگەری زۆرەوە لەم مانگەدا تیروپشکی ناوی حاجیان ئەنجام دەدەین.
ئەوە بۆ یەکەمینجاره لە کوردستان بە سیستمێکی دیجیتاڵی ناوی حاجیان تۆمار دەکرێت کە بەشێوەیەکی سەرکەوتوو کۆتایی هات و ئەم هەنگاوەیش یەکێک بووە لە کارنامەی کابینەی نۆیەمی حکوومەتی هەرێمی کوردستان بە سەرۆکایەتی مەسرور بارزانی بۆ کەمکردنەوەی رۆتین و ئەنجامدانی ئاسانکاری بۆ حاجیان و کە ئەم کارەش بە پاڵپشتی وەزیری ئەوقاف و کاروباری ئایینی د. پشتیوان سادق خرايه بواری جێبهجێكردن کە فەرمانگەی تەکنەلۆجیای زانیاری بەم کارەیە هەڵساون.
کۆمێنت (0)
تا ئێستا هیچ کۆمێنتێک نەکراوە.