ئامارەكان لە عێراقەوە شۆكهێنەرن و دەری دەخەن كە هەموو رۆژێك زیاتر لە 5 حاڵەتی هەوڵدان بۆ خۆكوشتن لە پارێزگاكانی ناوەڕاست و باشوور روودەدەن، لەوەش شۆكتر ئەوەیە كە بەشێك لەوانەی هەوڵی خۆكوشتن دەدەن چینی منداڵانن.
فەوزی ئەكرەم پەرلەمانتاری پێشووی عێراق بۆ ماڵپەڕی (عێراق ئەلیەوەم) گوتوویەتی: ئامارەكانی هەوڵدان بۆ خۆكوشتن لە عێراق بەردەوام روو لە بەرزبوونەوەیە و ئێستا هەموو رۆژێك بەلایەنی كەم 5 حاڵەت لە پارێزگاكان تۆمار دەكرێن.
پەرلەمانتارەكەی پێشووی عێراق هەروەها گوتوویەتی: 70%ی ئەوانەی هەوڵی خۆكوشتن دەدەن گەنجن و تەمەنیان لە خوارووی 30 ساڵەوەیە، واتە ئەوانەی لە دوای ساڵەكانی 2003 لەدایكبوون كە بەدەست قەیرانەكانی ناسەقامگیری ئەمنی و نەبوونی خزمەتگوزارییەكان و كەمی هەلی كار و هەژاری و خراپی گوزەرانی ژیان دەناڵێنن.
فەوزی ئەكرەم ئاماژە بەوەش دەكات: هەوڵەكان بۆ خۆكوشتن بەداخەوە خەریكە دەبێتە دیاردە و بەتایبەت كە ئێستا بەشێك لە منداڵانیش پەنا بۆ خۆكوشتن دەبەن، بەڵام بەشێك لەوان لە دوایین چركەساتەكاندا رزگار دەكرێن.
دەشڵێت: هۆكارەكانی هەوڵدان بۆ خۆكوشتن زۆرن، لەوانە كێشەی كۆمەڵایەتی، خەمۆكی، هەژاری، بێكاری، پاڵەپەستۆی خوێندن و بەكارهێنانی ماددەی هۆشبەر و چەندانی دیكە.
پەرلەمانتارەكەی پێشووی عێراق داواشی لە حكوومەتی عێراق كرد بەپەلە لیژنەیەكی نیشتمانی لە پسپۆڕانی زانستی كۆمەڵایەتی و دەروونی و مامۆستایانی زانكۆ پێكبهێنێت بەمەبەستی دانانی ستراتیژییەك بۆ رێگریكردن لە زیادبوونی حاڵەتەكانی خۆكوشتن.
ئەمە لەكاتێكدایە كە بەپێی دوایین ئامارە فەرمییەكان رێژەی بێكاری لەنێو گەنجانی عێراق لە ئاستێكی بەرزدایە و گەیشتۆتە 27% و رێژەی هەژاریش لەنێو هاووڵاتییان بەردەوام روو لە بەرزبوونەوەدایە.
کۆمێنت (0)
تا ئێستا هیچ کۆمێنتێک نەکراوە.